Enginn haft sam­band við Eddu: „Þetta er búið og gert“

Hefð er fyrir því að ýmiskonar skessur og kynjaverur mæti í þrettándagöngu í Vestmannaeyjum, og tvö tröll séu merkt þjóðþekktum einstaklingum. Í ár var annað tröllið merkt hlaðvarpsstjórnandanum Eddu Falak, sem hefur verið áberandi talskona gegn kynbundnu ofbeldi. Nafn hennar var ritað stórum stöfum sem Edda Flak framan á tröllið.

Framkvæmdastjóri sakaður um lygar

 Mikil umræða hefur skapast um málið á samfélagsmiðlum og hafa háværar gagnrýnisraddir í garð stjórnar ÍBV verið áberandi. Það vakti sérstaka athygli netverja að Haraldur Pálsson, framkvæmdastjóri ÍBV sagði í viðtali við Vísi um helgina að ekki hefði verið búið að merkja tröllið kvöldið áður og þetta hefði í raun farið framhjá honum sjálfum og öðrum í félaginu. Í viðtali í kvöldfréttatíma RÚV í gærkvöldi ítrekaði hann þessi ummæli og fullyrti að hann hafi ekki vitað til þess að til stæði að merkja skessuna Edda Flak.

Á myndböndum sem birst hafa frá undirbúningi göngunnar sést Haraldur sjálfur ásamt talsverðum fjölda fólks hinsvegar ganga um í skemmu kvöldið fyrir gönguna og virða fyrir sér tröllið þar sem nafn Eddu stendur greinilega skrifað stórum stöfum. Skjáskot úr myndbandinu ganga nú um samfélagsmiðla og Haraldur vændur um lygar.

„Búið og gert“

Sæunn Magnúsdóttir er formaður ÍBV. Aðspurð um hennar viðbrögð vegna málsins segir hún leiðinlegt að umræða um þessa flottu hátíð Vestmannaeyinga sé farin að snúast um þetta.

„Þetta er bara eins og það er, þetta er búið og gert. Það er búið að koma þeim skilaboðum til félagsins að þetta er ekki eitthvað sem við viljum standa fyrir. Við viljum gera betur. Eigum ekki að uppnefna fólk. Þetta hefur tíðkast hingað til en samfélagið hefur breyst. Það fer kannski ekki vel í samfélagið að taka þjóðþekktar persónur og setja það á tröllin, það er bara eitthvað sem við þurfum að endurskoða.“

Sæunn segir alvarlegt mál og aðför að bæjarfélaginu ef Vestmannaeyingar séu settir undir sama hatt og þeim sé gerð upp skoðanir. Hún telur að skoðanir eyjabúa á málinu séu mjög dreifðar.

„Það eru örugglega mörgum sem finnst þetta fyndið en mörgum sem finnst þetta örugglega afar óviðeigandi.“

Hvað finnst þér persónulega?

„Mér finnst þetta ósmekklegt, að uppnefna hana. En hitt er líka bara eitthvað sem við eigum að skoða, hvort það eigi enn þá rétt á sér að setja þjóðþekktar persónur á tröllin.“

Enginn haft samband við Eddu

Edda Falak hefur ekki svarað beiðnum fréttastofu um viðbrögð hennar vegna málsins. Hún hefur þó tjáð sig töluvert á samfélagsmiðlum um málið, sem hún lýsir sem ofbeldi og rasisma. Þá hefur hún kallað eftir því að þeir sem eiga hlut í máli axli raunverulega ábyrgð og lýst því yfir að enginn hafi beðið hana afsökunar. Sæunn staðfestir það.

„Ég hef allavega ekki rætt við hana, og veit ekki til þess að það hafi verið gert. Annað en að það er náttúrulega búið að biðjast afsökunar á þessu í fjölmiðlum.“

En ekki við hana sjálfa samt?

„Það held ég ekki.“