Segir á­standið í mið­­borginni orðið gott fyrir Þor­láks­­messu­ösina

Færð á akvegum og göngustígum í borginni hefur verið erfið frá því að mikla snjókomu gerði á aðfararnótt laugardags. Klára átti að ryðja síðustu húsagöturnar fyrir bílaumferð í gærkvöldi og í morgun. Nokkuð hefur verið kvartað undan að moksturinn gangi hægt í vikunni en formaður umhverfis- og skipulagsráðs borgarinnar sagði í gær að 26 snjóruðningstæki undirverktaka hafi ekki skilað sér út á göturnar fyrsta sólarhringinn eftir að snjókoman hófst.

Verslunar- og veitingastaðaeigendur hafa einnig vakið athygli á mikilli hálku á stéttum og göngugötum í miðborginni allt frá því um síðustu helgi. Þorláksmessa er einn annasamasti dagur ársins í miðborginni en þá flykkist fólk þangað, ýmist til að versla, fara í friðargöngu eða njóta veitinga kvöldið fyrir jól.

Hjalti Jóhannes Guðmundsson, skrifstofustjóri borgarlandsins hjá Reykjavíkurborg sem vetrarþjónustan heyrir undir, segir að unnið hafi verið á fullu við að salta og sanda klakabunka sem bræðslukerfi í miðborginni önnuðu ekki undanfarna tvo til þrjá daga. Verkefnið sé tímafrekt þar sem því þurfi að miklu leyti að sinna handvirkt.

„En það er okkar mat að eins og staðan er núna þá eigi þetta að vera í lagi,“ segir Hjalti við Vísi.

Bræðslukerfin undir gangstéttum séu ekki hönnuð fyrir aðstæður eins og verið hafa með miklum snjó og frosti. Því þurfi að grípa til gamalla og góðra ráða eins og að salta og sanda.

Göngustígar eiga að vera greiðfærir

Hvað gangstéttir og göngustíga í borginni almennt varðar segir Hjalti að þeir eigi að vera greiðfærir fyrir hjólandi og gangandi að mestu leyti. Vel hafi tekist að ryðja það kerfi í gegnum veðurhvellinn nú og ekki hafi borist margar ábendingar vegna þess.

Blaðamaður varð þó sjálfur vitni að því að skafin gangstétt við Hringbraut endaði í illfæru skafli við gatnamót við Framnesveg í dag. Hjólreiðamaður sem átti þar leið hafði aðeins um tvo kosti að velja:  að halda á hjólinu og skakklappast í gegnum skaflinn eða hætta sér út á fjölfarna götuna.

Hjalti segir að þegar búið séð að ryðja gatnakerfið í kross verði til ruðningar.

„Þetta er bara það sem við eigum svo eftir að snyrta til. Við munum reyna að fara í þessu helstu gatnamót og snyrta þau til. Það er alveg örugglega einhverjir svona staðir sem svona ástand er á stígakerfinu,“ segir hann.

Allir megin- og tengistígar eigi hins vegar að vera í frambærilegu ástandi.