Norð­austan stormur og við­varanir

Vegna vindsins eru viðvaranir í gildi á sunnan- og vestanverðu landinu og má búast við skafrenningi og lélegu skyggni sem geti valdið ökumönnum erfiðleikum.

Í hugleiðingum veðurfræðings á vef Veðurstofunnar segir að það verði éljagangur norðan- og austanlands en annars yfirleitt léttskýjað. Frost verður á bilinu þrjú til tólf stig og kaldast inn til landsins.

„Það dregur hægt úr vindi á morgun, norðaustan 10-18 m/s annað kvöld en enn hvassviðri eða stormur í Öræfum. Áfram él norðan og austantil en þurrt að kalla suðvestantil. Frost 0 til 5 stig.

Eftir þriðjudag og fram til föstudags er útlit fyrir hægari norðanáttir, dálítil él á norðanverðu landinu en þurrt og yfirleitt bjart sunnan heiða. Talsvert frost víða um land,“ segir í hugleiðingum veðurfræðings.

Nánar má lesa um viðvaranir Veðurstofunnar á vef Veðurstofunnar.

Veðurhorfur á landinu næstu daga

Á þriðjudag: Norðaustan 13-18 m/s, en 18-23 suðaustantil í fyrstu. Dregur síðan smám saman úr vindi. Éljagangur víða um land, en þurrt að kalla suðvestantil. Frost yfirleitt 0 til 5 stig.

Á miðvikudag (vetrarsólstöður): Norðaustlæg átt 8-15 og él, en bjartviðri sunnan- og vestanlands. Harðnandi frost.

Á fimmtudag: Norðlæg átt 5-10 og dálítil él norðan- og austanlands, en annars bjartviðri. Frost 5 til 12 stig.

Á föstudag (Þorláksmessa): Norðlæg átt og bjart að mestu en skýjað og lítilsháttar él við norður- og austurströndina, bætir í él um kvöldið. Frost 7 til 15 stig.

Á laugardag (aðfangadagur jóla): Breytileg átt, snjókoma norðan- og austantil en annars stöku él. Talsvert frost um land allt.

Á sunnudag (jóladagur): Útlit fyrir norðlæga átt og dálítil él í flestum landshlutum. Áfram mjög kalt í veðri.