Selur 60 prósenta hlut í fé­lagi sem metið er á um 42 milljarða króna

Framleiðslufyrirtækið Plan B hefur staðið fyrir framleiðslu á fjölda verðlaunamynda, meðal annars Moonlight og The Big Short. Pitt hefur nú selt Mediawan 60 prósenta eignarhlut.

Plan B var stofnað árið 2001 af Pitt, þáverandi kærustu hans, Jennifer Aniston, og umboðsmanninum Brad Grey sem lést árið 2017. Eftir skilnað Pitt og Aniston varð Pitt hins vegar eini eigandi félagsins.

Í frétt WSJ segir að samkvæmt samningnum nú eigi Pitt og viðskiptafélagar hans, Gardner og Jeremy Kleiner, að koma áfram að starfsemi framleiðslufélagsins.

Pitt sagði í viðtali við Financial Times að félagið hafi strax í byrjun hafi fyrirtækið verið „of stórt fyrir litla bílskúrinn okkar“.

Hver verðlaunamyndin á fætur annarri

Þrjár af myndum Plan B – The Departed, 12 Years a Slave og Moonlight – hafa unnið Óskarsverðlaun sem besta kvikmynd ársins. Í hópi nýrri mynda má svo nefna Blonde, mynd um Marilyn Monroe, og She Said, mynd sem fjallar um sögu blaðamanna hjá New York Times sem áttu þátt í að afhjúpa kynferðisbrot kvikmyndaframleiðandans Harvey Weinstein.

Pitt segir í samtali við FT að honum hafi þótt að Mediawan hafi boðið sanngjart verð í félagið. Mediawan hefur á síðustu árum staðið að framleiðslu á til dæmis þáttunum Call My Agent og myndinni um Skytturnar þrjár.

Mediawan var stofnað árið 2019 af fjarskiptamógúlnum Xavier Niel, fjárfestinum Matthieu Pigasse og sjónvarpsframleiðandanum Pierre-Antoine Capton. Umsvif félagsins hafa vaxið mikið á síðustu árum og hefur það keypt upp minni framleiðslufyrirtæki, meðal annars á Spáni og í Þýskalandi.

Plan B er fyrsta bandaríska framleiðslufyrirtækið sem Mediawan kaupir. „Plan B er besta óháða framleiðslufyrirtækið í Bandaríkjunum,“ segir forstjóri Mediawan, Pierre-Antoine Capton.

Reese Witherspoon seldi sitt félag

WSJ segir í grein sinni að kaup Mediawan á Plan B sé eitt af mörgum nýlegum dæmum þar sem fjölmiðlarisar hafi keypt upp smærri framleiðslufyrirtæki sem stofnuð voru af þekktum Hollywood-stjörnum.

Á síðasta ári keypti þannig skemmtanarísinn Candle Media, sem er í eigu fyrrverandi fjármálastjóra Disney, Kevin Mayer, og Tom Staggs, framleiðslufyrirtækið Hello Sunshine sem stórleikkonan Reese Witherspoon stofnaði á sínum tíma. Hello Sunshine hefur framleitt þætti á borð við The Morning Show á Apple TV+. Sá samningur var metinn á 900 milljónir dala, um 160 milljarða króna.

Sömu sögu er að segja af framleiðslufyrirtækinu Westbrook sem Candle Media keypti hlut í á síðasta ári. Hjónin Will Smith og Jada Pinkett-Smith stofnuðu Westbrook árið 2019.