Selja­skóli og Sæ­mundar­skóli á­fram í Skrekk

Átta grunnskólar tóku þátt en það voru Hlíðaskóli, Seljaskóli, Klettaskóli, Víkurskóli, Háteigsskóli, Laugalækjarskóli, Sæmundarskóli og Foldaskóli. 

„Seljaskóli með atriðið Yndislegt líf og Sæmundarskóli með atriðið Af hverju ég? komust áfram í úrslitin. 

236 ungmenni úr Reykjavík tóku þátt í atriðunum og sýndu hæfileika á sviði sviðslista í frumsömdum atriðum sem þau hafa samið sérstaklega fyrir stóra sviðið í Borgarleikhúsinu vegna Skrekks,“ segir í tilkynningunni.

Hagaskóli og Fellaskóli komust áfram á fyrsta undanúrslitakvöldinu á mánudag. 

Undanúrslit Skrekks fara fram dagana 7., 8. og 9. nóvember í Borgarleikhúsinu, en að þessu sinni taka 614 unglingar úr 24 skólum þátt í keppninni. Átta skólar munu komast í úrslit sem fara fram 14. nóvember.

Í tilkynningu frá Reykjavíkurborg segir að atriðin í ár fjalli um sjálfs­mynd ung­linga, áhrif samfélagsmiðla, tónlistar- og danssögu, missi, einelti, andlega erfiðleika, upplifun ungmenna af erlendum uppruna, mikilvægi þess að njóta lífsins og hafa gaman, ádeilu á íslenskt samfélag, heimilisofbeldi og ástarsögur. Unglingarnir nýta all­ar sviðslist­ir í atriðin; tónlist, dans, leik­list og gjörn­inga.