Stefnir í hita­fund í Eyjum: „Átt and­vöku­nætur og oft verið ná­lægt tárum yfir þessu“

Grétar Þór Eyþórsson, nú fyrrverandi formaður handknattleiksráðsins, segir í samtali við Vísi að í raun sé málið einfalt. Hingað til hafi stefnan verið sú að handknattleiks- og knattspyrnudeildir ÍBV fái jafnmikið í sinn hlut frá aðalstjórn og bakhjörlum ÍBV. Því hafi verið breytt í vetur og svo virðist sem sú breyting sé til frambúðar, þannig að handknattleiksdeildin missi af tugum milljóna króna til knattspyrnudeildarinnar.

Þannig segir Grétar að aðalstjórn ÍBV hafi í mars ákveðið að veita knattspyrnudeildinni á fimmta tug milljóna í styrk en handknattleiksdeildinni 23 milljónir. Sams konar skipting, eða 65/35, hafi verið innleidd í samninga við helstu bakhjarla ÍBV svo að aðeins þriðjungur af þeim styrkjum færi til handknattleiksdeildarinnar.

Harma að málið hafi ratað í fjölmiðla

Þór Vilhjálmsson, formaður aðalstjórnar ÍBV, vildi ekki ræða málið við Vísi. Í yfirlýsingu sem aðalstjórn ÍBV sendi á fjölmiðla í dag segir að aðalstjórn hafi unnið að tillögum um breytingar sem snúa að þessum málum og muni á aðalfundinum í kvöld leggja fram tillögu um skipun nefndar til að leysa úr þeim ágreiningi sem sé til staðar.

Grétar segir hins vegar alveg ljóst að búið sé að marka þá stefnu að fótboltinn fái meira en handboltinn í Eyjum og því hafi handknattleiksráðið ekki séð annað í stöðunni en að segja af sér.

„Mér finnst einfaldast að útskýra þetta þannig að ef að tveir menn eru að vinna sömu vinnuna, og annar á eitt barn, á hann þá að fá meira borgað en hinn? Nei. Hann þarf bara annað hvort að hugsa betur um peningana sína eða fá sér aukavinnu,“ segir Grétar.

„Við ætlum ekki að skipta vinnunni jafnt á milli handbolta og fótbolta en skipta tekjunum ójafnt. Ég held að enginn sætti sig við slíkt,“ segir Grétar sem ætlar að vera á meðal fundargesta í kvöld. Hann býst ekki við því að horfið verði til þess að skiptingin verði jöfn á milli deildanna:

„Alls ekki þannig að við séum á móti fótboltanum á neinn hátt“

„Nei. Við erum búin að funda það oft um þetta með aðalstjórn og höfum alltaf fengið sama viðmótið. Í greinargerð sem framkvæmdastjóri félagsins [Haraldur Pálsson] gerði er einungis talað um hve slæmt fótboltinn hafi það en aldrei tekinn upp hanskinn fyrir handboltann. Það var því alveg ljóst frá upphafi að þessi greinargerð frá framkvæmdastjóranum væri leiðandi í það að skiptingin yrði 65/35.

Við erum búin að koma með okkar tillögur en þeim hefur alltaf verið neitað. Við sáum í raun ekki annað í stöðunni en að segja af okkur öll, og vorum öll samstíga í því. Það var virkilega erfið ákvörðun þar sem við erum öll miklir félagsmenn og höfum leikið fyrir félagið. Þetta er ekki eitthvað sem manni dettur í hug að gera upp úr þurru. Og það er alls ekki þannig að við séum á móti fótboltanum á neinn hátt, enda er það aðalstjórn sem fer með þetta mál,“ segir Grétar.

Samningur við Erling í lausu lofti?

Grétar er fyrrverandi leikmaður ÍBV en þegar ferlinum lauk tók hann við sem formaður handknattleiksráðs og hefur gegnt því starfi í rúmt ár. Ljóst er að handknattleiksstarfið í Eyjum er í lausu lofti eftir tíðindi dagsins:

„Við áttum eftir að klára ýmsa pósta. Það á eftir að klára samning við Erling Richardsson [þjálfara karlaliðsins] og ég veit ekkert hvort það er í uppnámi. Okkur vantar líka markmann í kvennaliðið og varamarkmann í karlaliðið, svo dæmi séu tekin,“ segir Grétar sem segir að þó að allir í handknattleiksráði hafi verið sammála um að stíga frá borði sé það ekki auðveld ákvörðun:

„Þetta var þungbær ákvörðun en óumflýjanleg í ljósi aðstæðna. Ef að við myndum lúffa fyrir þessu þá veit ég alveg hvað myndi gerast eftir tvö ár. Þá yrði skiptingin enn verri. Maður hefur átt andvökunætur og oft verið nálægt tárum yfir þessu enda hefur maður unnið og starfað í handboltanum alla tíð.“

„Munum ekki starfa fyrir félagið nema á jafnréttisgrundvelli“

Í kjölfar viðtals Vísis við Grétar sendi hann eftirfarandi yfirlýsingu fyrir hönd fráfarandi handknattleiksráðs ÍBV, þar sem aðalstjórn er hvött til að breyta ákvörðun sinni um skiptingu fjár: