Júlíus Orri gengur til liðs við Stjörnuna | Gunnar og Tómas framlengja

Frá þessu er greint á samfélagsmiðlum Stjörnunnar, en Júlíus lék með Caldwell há­skól­an­um í New Jers­ey á síðustu leiktíð. Hann er 21 árs bakvörður sem er alinn upp hjá Þór Akureyri. Hann á að baki 52 leiki fyrir Þór í efstu deild og þykir með efni­legri leik­mönn­um lands­ins.

Þá hafa þeir Gunnar Ólafsson og Tómas Þórður Hilmarsson skrifað undir nýja samninga við félagið, en báðir eru þeir til tveggja ára. Gunnar kom til Stjörnunnar um áramótin 2019-2020 og á að baki 64 leiki fyrir félagið í efstu deild. Þá hefur hann orðið bikarmeistari með félaginu í tvígang.

Tómas Þórður hefur verið heldur lengur á mála hjá Stjörnunni. Hann lék sinn fyrsta meistaraflokksleik fyrir Stjörnuna árið 2011 og hefur síðan þá leikið 266 leiki fyrir félagið og fagnað bikarmeistaratitli fimm sinnum.