Sjáðu brot Dags sem var í ætt við Júggabragðið

Úrslitin í leiknum voru ráðin í hálfleik enda voru Valsmenn þá með þrettán marka forystu, 22-9. Eyjamenn svöruðu aðeins fyrir sig í seinni hálfleiknum og gengu hart fram.

Á 43. mínútu fór Dagur í fótinn á Stiven í hraðaupphlaupi. Valsmaðurinn féll við en skoraði samt.

„Maður sér það strax að hann sér mjög eftir þessu en hann kippir aðeins í hnéð á honum,“ sagði Stefán Árni Pálsson í Seinni bylgjunni eftir leikinn í gær.

Ásgeir Örn Hallgrímsson sagði að brot Dags minnti um margt á eitt þekktasta fautabragð handboltans.

„Þetta er ekki beint Júggatrixið en í ættina við það. Þetta á ekki að sjást, það er ekki flóknara en það. Þetta er stórhættulegt og við viljum ekki sjá svona,“ sagði Ásgeir. Róbert Gunnarsson tók í sama streng en hafði smá samúð með Degi.

„Ég er sammála því en ég held að þetta hafi verið ósjálfráð viðbrögð að stoppa hann. Ég held að hann hafi ekki ætlað að „Júgga“ hann. En þetta er stórhættulegt og hefði getað farið illa,“ sagði Róbert.

Ótrúlegt en satt slapp Dagur við brottvísun fyrir brotið á Stiven. Eyjamenn fengu fimm brottvísanir í leiknum en Valsmenn sjö.

Annar leikur Vals og ÍBV fer fram í Vestmannaeyjum á sunnudaginn. Leikurinn hefst klukkan 16:00 og verður sýndur beint á Stöð 2 Sport. Upphitun Seinni bylgjunnar hefst klukkan 15:20.