Verslun 10-11 í Leifs­­stöð selur bjór í flöskum

Í afgreiðsluborði verslunarinnar má finna leyfisbréf, sem gefið var út af Sýslumanninum á Suðurnesjum í janúar á þessu ári. Lesandi Vísis sendi inn mynd af rekstrarleyfinu og þó hún sé óskýr má þar lesa að veitingaleyfið gildir allan sólarhringinn og um er að ræða rekstrarleyfi veitingastofa og greiðasölu í flokki II. Gildistími leyfisins er ótímabundinn. 

Sami lesandi sendi sömuleiðis inn mynd af bjórnum sem er til sölu í versluninni, sem er ekki fyrir innan öryggishliðin á flugvellinum heldur á svæði sem allir, gestir og gangandi, komast á. Á þeirri mynd má sjá að veslunin selur Stellu Artois, með 4,6 prósenta vínstyrk og af umbúðunum má dæma að um sé að ræða bjór sem er gerður til sölu í Bretlandi og er á þeim meðal annars vísað í tilmæli embættis landlæknis á Bretlandi um ábyrga drykkju. Stella sem seld er í íslenskum áfengisverslunum er með 5 prósenta vínstyrk. 

Jákvæðar umsagnir eftirlitsaðila ekki opinberar

Aðeins þrjár 10-11 verslanir eru eftir á landinu: í Leifsstöð, á Laugarvegi við Hlemm og á Austurstræti. Hvorug verslananna í Reykjavík er með vínveitingaleyfi, þó þær selji veitingar, til dæmis pylsur og bakkelsi, eins og verslunin í Leifsstöð. 

Orkan, sem rekur verslanir 10-11, hefur ekki svarað fyrirspurn fréttastofu þess efnis hvort til standi að sækja um vínveitingaleyfi fyrir hinar tvær verslanir 10-11 í Reykjavík.

Þegar fréttmaður hafði samband við Sýslumanninn á Suðurnesjum sagði starfsmaður hans, sem sér um afgreiðslu leyfa sem þessara, að verslunin hafi uppfyllt öll skilyrði til veitingaleyfis. Þá hafi eftirlitsaðilar, líkt og sveitarfélagið og lögreglan, skilað inn góðum umsögnum um verslunina. Þær umsagnir eru ekki gerðar opinberar og að sögn hans ekki hægt að nálgast hjá sýslumannsembættinu. 

Ekki hefur borist svar frá sýslumannsembættinu við beiðni fréttastofu um að fá gögnin afhent. 

Komi ekki á óvart að matvöruverslun sé farin að selja áfengi

Ólafur Stephensen framkvæmdastjóri Félags atvinnurekenda sem hefur verið ötull talsmaður þess að afnema einkarétt ríkisins á sölu áfengis, segir vínveintingaleyfi 10-11 í Leifsstöð til marks um hve gölluð áfengislöggjöfin hér á landi er. 

„Þessi svokallaði einkaréttur ríkisins á sölu áfengis er orðinn mjög götóttur. Það er engum vandkvæðum háð að kaupa sér áfengi eftir öllum mögulegum öðrum leiðum,“ segir Ólafur. 

„Það er hægt að heimsækja til dæmis lítil brugghús, þó þau hafi formlega ekki leyfi til að selja áfengi út úr húsi, og kaupa sér kippu. Það er hægt að taka með sér óopnaðan bjór til dæmis úr vegasjoppum sem eru með vínveitingaleyfi. Það er hægt að vera í smakkklúbbi og fá vínið sitt sent mánaðarlega eða vikurlega. Það er vín sem kemur ekki við í ríkinu og svo eru það þessar netverslanir.“

Hann segir ekki koma á óvart að matvöruverslun með veitingaleyfi sé farin að selja áfengi.

„Það sýnir kannski fram á þörfina á því að endurskoða þetta fáránlega kerfi. Að alls konar leiðir fram hjá einkarétti ríkisins séu látnar viðgangast. Ætli lögreglan á Keflavíkurflugvelli komi ekki bara oft við í þessari búð án þess að gera við þetta nokkrar athugasemdir. En svo sé öðrum bannað að selja áfengi. Það er miklu nær að bara leyfa þetta almennt og yfirleitt en setja þá líka um það reglur og ramma,“ segir hann.

„Alþingi verður að fara að taka þetta til skoðunar og áfengislöggjöfina almennt.“