Sara Rún stigahæst í tapi

Jafnræði var með liðunum framan af leik og lítið sem virtist geta skilið þau að. Þegar flautað var til hálfleiks var munurinn aðeins tvö stig, staðan 38-36 Satu Mare í vil.

Sara og stöllur hennar áttu svo afleitan þriðja leikhluta þar sem liðið skoraði aðeins fimm stig. Heimakonur í Satu Mare gengu á lagið og náðu afgerandi forystu. Það bil sem þarna myndaðist á milli liðanna náðu Sara og liðsfélagar hennar aldrei að brúa og niðurstaðan varð 13 stiga tap, 65-52.

Sara var sem áður segir stigahæst í liði Phoenix Constanta með 14 stig, en hún tók einnig tvö fráköst og gaf fjórar stoðsendingar.

Vinna þarf þrjá leiki til að tryggja sér þriðja sætið, en liðin mætast á nýjan leik á heimavelli Phoenix Constanta næstkomandi föstudag.