Segist hafa látið um­mælin falla í pirringi eftir mikla skemmtun

Frá því að fréttir bárust af ummælum Sigurðar Inga Jóhannssonar um Vigdísi Häsler framkvæmdastjóra Bændasamtakanna hefur ráðherra engar skýringar veitt á framferði sínu aðrar en þær sem komu fram í yfirlýsingu hans á Facebook.

Sigurður Ingi mætti þó í beina úsendingu í kvöldfréttum RÚV og tjáði sig þar í fyrsta sinn um málið. 

„Það er þannig að á fimmtudagskvöldið síðasta þá var Búnaðarþingsboð. Mikill söngur, gleði, mikil skemmtun að hætti okkar Framsóknarmanna og bænda. Þegar nokkuð var liðið á samkomuna þá komu starfsmenn Bændasamtakanna til mín og vildu að ég tæki þátt í myndatöku sem fólst í því að lyfta framkvæmdastjóra Bændasamtakanna í einhvers konar planka,“ sagði Sigurður Ingi í kvöldfréttum RÚV. 

„Mér fannst það ekki viðeigandi, alls ekki við þessar aðstæður eða tíma, og lét þá falla orð sem ég sé eftir og hef beðist afsökunar á og skil vel upplifun Vigdísar. Þá reyndi ég að hafa samband við hana strax daginn eftir og reyndar um helgina í gegnum formann Bændasamtakanna þar sem ég vildi gefa henni svigrúm.“

Hann sagðist ekki ætla að endurtaka ummælin, en óljóst er hver þau voru nákvæmlega. Þau eiga að hafa verið eitthvað á þessa leið: Á að lyfta þeirri svörtu?

„Það er einfaldlega þannig að það sem einu sinni hefur verið sagt of mikið á maður ekki að segja aftur og ég verð að segja alveg eins og er að maður þarf auðvitað að læra af mistökum sínum. Og eins og ég sagði í yfirlýsingu minni þá er það sárt að það þurfi að bitna á öðrum,“ segir Sigurður. 

„Það var komið langt inn í samkvæmið og ítrekað reynt að fá mig til að gera eitthvað sem að ég vildi ekki taka þátt af því að mér þótti það óviðeigandi og missti út úr mér þessi orð sem ég sé eftir.“

Vakið hefur athygli að aðstoðarmaður Sigurðar Inga, Ingveldur Sæmundsdóttir, svaraði um helgina fyrirspurn fjölmiðla um málið þannig að fréttir af ummælum hans væru algjört bull. Ráðherrann hefði ekkert slíkt sagt heldur haft á orði að hann vildi ekki halda á Sjálfstæðismanni við myndatökuna. Aðspurður segir Sigurður Ingveldi ekki munu sæta neinum afleiðingum fyrir meint ósannindi.

„Nei, ég held það sé nú reyndar ekki þannig, þetta var hennar upplifun. Hún var ekki við hliðina á mér allan tímann. Þetta tók nokkrar mínútur og þegar hún stígur inn þá er þetta upplifun hennar, það sem hún heyrir,“ segir Sigurður. 

Sigurður segist þá upplifa að hann hafi traust innan ríkisstjórnarinnar, þó fjöldi ráðherra hafi fordæmt ummælin, og segist ekki hafa íhugað afsögn. 

„Nei, ég hef ekki íhugað það. Mér finnst ekki tilefni til þess.“