Elvar Már er genginn til liðs við Derthona

Elvar kemur til liðsins frá Antwerp Giants þar sem hann hefur leikið undanfarið en hann mun yfirgefa BNXT deildina sem sá leikmaður með flestar stoðsendingar, 7,3 stoðsendingar á leik.

Derthona er í fimmta sæti ítölsku Lega A deildarinnar sem er efsta deildin þar í landi. Liðið komst í úrslitaleik um ítalska bikarinn í ár.

Elvar Már stóð sig afar vel í landsleikjum Íslands gegn Ítalíu í febrúar síðastliðnum þar sem hann skoraði 27,5 stig, tók 5 fráköst og gaf 4 stoðsendingar að meðaltali yfir leikina tvo, frammistaða sem hefur sennilega vakið athygli ítalska liðsins.

Derthona er staðsett í Tortona í norður Ítalíu. Liðið hefur verið að taka miklum framförum en félagið komst upp í efstu deild fyrir tveimur árum. Yfirlýst markmið félagsins er að vera komið í evrópukeppni innan fárra ára en mikið fjármagn hefur verið lagt í liðið undanfarið og nýlega var byggð ný 5.000 sæta höll fyrir liðið, í bæjarfélagi sem telur um 30.000 íbúa.