Skipulagsbreytingar hjá Landsvirkjun á sviði sölu og þjónustu

Valur Ægisson hefur verið ráðinn forstöðumaður viðskiptastýringar en hann hefur starfað hjá Landsvirkjun frá árinu 2012 og var síðast forstöðumaður viðskiptagreiningar og þróunar markaða. Áður en hann kom til Landsvirkjunar starfaði hann í fjármálageiranum. 

Valur hefur undanfarin ár komið að flestum raforkusamningum fyrirtækisins undanfarin ár, unnið að þróun vöruframboðs og komið að stefnumarkandi verkefnum. Hann er verkfræðingur með bakkalár gráðu í iðnaðarverkfræði og masters gráðu í rekstrarverkfræði.

Dagný tekur við af Vali

Dagný Ósk Ragnarsdóttir tekur við starfi Vals sem forstöðumaður viðskiptagreiningar og þróunar markaða en áður starfaði hún sem sérfræðingur í viðskiptagreiningu hjá fyrirtækinu og þar áður sinnti hún stöðu sérfræðings í fjarstýringu fyrirtækisins. 

Áður en hún hóf störf hjá Landsvirkjun starfaði hún meðal annars við rannsóknir á sviði heilsuhagfræði og sem hugbúnaðarsérfræðingur í fjármálalausnum. Hún er með bakkalár gráður í hagfræði og tölvunarfræði. 

Úlfar leiðir viðskiptaþjónustuna

Að lokum mun Úlfar Linnet áfram gegna stöðu forstöðumanns viðskiptaþjónustu en hann hefur sinnt fjölbreyttum verkefnum innan Landsvirkjunar og starfaði í rúmlega tíu ár sem forstöðumaður rannsóknardeildar á þróunarsviði áður en hann flutti sig árið 2019 yfir í greiningadeild markaðs- og viðskiptaþróunarsviðs. 

Hann hefur sömuleiðis starfað fyrir hönd Landsvirkjunar sem stjórnarmaður hjá CEATI/HOPIG 2018 til 2019. Í viðskipaþjónustu leiðir Úlfar áframhaldandi þróun á viðmóti raforkukaupa hjá Landsvirkjun. Hann er með bakkalár gráðu í rafmagns- og tölvuverkfræði og lauk verkfræðinámi með áherslu á bestun og tölfræði.