Skuldar þrotabúi félags sonarins þrettán milljónir

Jón á langan feril að baki í viðskiptum og hefur oft verið til umfjöllunar í fjölmiðlum. Hann erfði hlut í Hótel Valhöll á Þingvöllum frá foreldrum sínum og var lengi kenndur við þann stað. Ítarlega var fjallað um Jón á Vísi árið 2014, þegar deilur hans við veitingamanninn Jose Garcia, oft kenndur við Caruso, stóðu yfir.

Eignarhaldsfélagið Harrow House sem hélt utan um eignarhald á veitingastaðnum Primo var tekið til gjaldþrotaskipta í apríl 2020. Í dómi héraðsdóms kemur fram að Harrow House hafi yfir tveggja ára tímabil millifært 9,8 milljónir króna á bankareikning Jóns.

Harrow House og veitingastaðurinn Primo voru í eigu Valdimars Jónssonar, sonar Jóns.

Millifærslurnar voru bókaðar í bókhaldi félagsins sem kröfur á hendur Jóni, án frekari skýringa. Þá kemur einnig fram að Jón hafi tekið út vörur og þjónustu hjá Harrow House að upphæð 914 þúsund króna. Að auki var eldri krafa á hendur Jóni í bókhaldi félagsins upp á 2,1 milljón króna, sem færð hafði verið á viðskiptamannareikning úr eldra bókhaldskerfi félagsins.

Þá var einnig skráð í bókhald Harrow House að hluta af kröfu Hótel Valhallar, félags í eigu Jóns, var skuldajafnað á móti útistandandi kröfu Jóns á Harrow House.

Sagði greiðslurnar vera leigu til félags í eigu Jóns

Eftir að Harrow House var tekið til gjaldþrotaskipta krafði þrotabúið Jón um greiðslu þessara skulda, sem hafi verið ógreiddar. Þá krafðist þrotabúið einnig að umrædd skuldajöfnun yrði dæmt ólögmæt.

Fyrir dómi hélt Jón því fram að greiðslur Harrow House til hans hafi verið hluti af leigugreiðslum félagsins til Hótel Valhallar, sem greiddar hafi verið beint til hans af fyrirmælum leigusalans, sem var Hótel Valhöll.

Þá hafi úttektir á veitingastaðnum ekki verið einkaúttekir hans heldur úttektir Hótel Valhallar, sem síðar hafi verið jafnað á móti leigukröfum félagsins. Það sama hafi átt við um eldri skuld sem getið var hér að ofan.

Mótmælti hann því einnig að um hafi verið að ræða greiðslur án endurgjalds. Þvert á móti hafi þetta verið greiðslur fyrir afnot af húsnæði í eigu félags í eigu Jóns, sem hafi verið nauðsynlegt Harrow House til að afla tekna.

Engir samningar eða gögn

Héraðsdómur Reykjavíkur féllst ekki á að umræddar greiðslur á bankareikning Jóns hafi verið vegna leigu á fasteign Hótel Valhallar. Þó að það félag væri í eigu Jóns væri það sjálfstæður lögaðili sem ekki væri samsamaður eigenda sínum á þann hátt sem Jón hélt fram fyrir dómi.

Greiðslur Harrow House til Jóns voru því ekki taldar vera greiðslur til Hótel Valhallar.

„Til þess að svo yrði þyrftu að liggja fyrir samningar, fyrirmæli eða önnur gögn sem sýndu fram á eða gerðu sennilegt að svo hefði verið. Svo er ekki í máli þessu,“ segir í dómi héraðsdóms.

Að mati héraðsdóms á það sama við um úttektir á vörum og þjónustu Harrow House og eldri skuld hans við félagið.

„Að mati dómsins liggur ekki annað fyrir í málinu en að um hafi verið að ræða úttektir og skuldir stefnda sjálfs en ekki Hótel Valhallar ehf..,“ segir ennfremur.

Féllst dómurinn því á þá kröfu að hin 12,9 milljón króna skuld væri ógreidd. Þarf Jón því að greiða þrotabúinu umrædda fjárhæð.