EM-hlaðvarp Seinni bylgjunnar: Slæmi kaflinn kom aldrei

Runólfur Trausti Þórhallsson skrifar 15. janúar 2022 12:16

Ísland vann flottan fjögurra marka sigur á Portúgal. Slæmi kaflinn var hvergi sjáanlegur í leiknum. Kolektiff Images/Getty Images

Ísland vann góðan fjögurra marka sigur á Portúgal í fyrsta leik Evrópumótsins í handbolta á föstudagskvöld. Hinn margumtalaði „slæmi kafli“ kom aldrei hjá íslenska liðinu.

Stefán Árni Pálsson, þáttastjórnandi, spurði þá Ásgeir Örn Hallgrímsson og Róbert Gunnarsson hvort eitthvað hefði komið á óvart í sigri Íslands á Portúgal.

„Það kom á óvart að við áttum aldrei einhvern kafla sem var lengri en ein eða ein og hálf mínúta þar sem við vorum að spila illa. Það kom aldrei uppáhalds kaflinn hans Gaua (Guðjóns Vals Sigurðssonar) þessi „slæmi kafli.“ Hann kom bara aldrei í leiknum. Heilt yfir var þetta stöðug og góð frammistaða allan leikinn,“ sagði Ásgeir Örn Hallgrímsson og hélt áfram.

„Svo voru þetta einhver tvö áhlaup. Á 20. mínútu tökum við þrjú í röð, náum þessu upp í fjögur mörk. Þeir koma aðeins til baka og svo aftur á 38. mínútu siglum við þessu upp í sex mörk. Það kom aldrei neitt bakslag.“

„Ég get alveg tekið þetta undir þetta. Ef maður á að reyna að vera klókur og bæta einhverju við þá kom það mér smá á óvart hvað við vorum flottir. „Svægið“ í Ómari Inga (Magnússyni) og öllu liðinu. Það kom mér smá á óvart - svona miðað hvað maður hefur séð áður - hvað þeir voru flottir, sem er jákvætt. Maður þorir aldrei að vona of mikið, maður heldur svo mikið með þeim. Það var æðislegt,“ sagði Róbert Gunnarsson um sigurinn gegn Portúgal.

„Svo kom það mér skemmtilega á óvart þegar Viktor Gísli (Hallgrímsson, markvörður) kom inn á. Hann stóð sig virkilega vel. Ég held að þetta sé auðveldara fyrir hann, að vera númer tvö og koma inn á,“ bætti Róbert við.

„Þegar þessi slæmi kafli er alveg að fara koma hjá okkur þá varði Viktor Gísli algjört dauðafæri. Þar kláraðist leikurinn,“ sagði Stefán Árni að endingu um „slæma kaflann“ sem kom aldrei.

Þáttinn í held sinni má hlusta á hér að neðan en umræðan varðandi skort á „slæma kaflanum“ hefst eftir rúmar 26 mínútur.

Handbolti EM karla í handbolta 2022 Seinni bylgjan

Tengdar fréttir

Topparnir í tölfræðinni á móti Portúgal: Réðust á portúgölsku vörnina

Íslensku strákarnir voru frábærir maður á mann í óskabyrjun á Evrópumótinu í handbolta.

14. janúar 2022 21:50

Einkunnir strákanna okkar á móti Portúgal: Gísli bestur en margir góðir

Guðmundur Guðmundsson lagði leikinn frábærlega upp og leikstjórnandinn var besti maður íslenska liðsins sem fékk að launum óskabyrjun á Evrópumótinu í handbolta.

14. janúar 2022 22:00

„Vorum með ákveðið plan sem við fylgdum eftir“

„Hún er frábær. Þetta var rosalega vel útfærður leikur hjá strákunum. Hann fór í raun alveg eins og við vorum búnir að planleggja,“ sagði hæstánægður Guðmundur Guðmundsson, landsliðsþjálfari Íslands, um tilfinninguna að loknum frábærum fjögurra marka sigri Íslands á Portúgal í fyrsta leik liðsins á EM í handbolta.

14. janúar 2022 21:10

„Vorum aldrei að fara að tapa þessu“

„Þetta var rock solid frammistaða hjá okkur. Í vörn og sókn. Við hikstuðum kannski smá þegar þeir fóru í 5-1 vörn. Ég er mjög sáttur með þetta,“ sagði fyrirliðinn Aron Pálmarsson eftir sigurinn gegn Portúgal á EM í kvöld.

14. janúar 2022 21:35

Ýmir: Kveikir í mér að sjá þá pirraða og tuðandi

„Við fengum langan tíma í þennan undirbúning svo við vissum alveg – höfum spilað við þá áður – að þeir voru að fara svæfa okkur. Byrja rólega, klippa inn hornin, ekkert að gerast, svo kemur kerfið og vona að við séum komnir á hælana og svo kemur árásin,“ sagði Ýmir Örn Gíslason, um mótherja Íslands á EM í handbolta í kvöld.

14. janúar 2022 21:45