Blómasalar ákærðir fyrir tollsvik

Ákærðu er gefið að sök að hafa dregið aðflutningsgjöld upp á tæpar sex milljónir undan tollálagningu vegna fjögurra sendinga.

Blómainnflytjendurnir eru sagðir hafa gefið tollayfirvöldum rangar upplýsingar um magn og tegundir blóma. Til þess nutu þeir aðstoðar hollensks seljanda til að gefa út reikninga sem voru ekki í samræmi við raunverulegt innihald sendinganna.

Í öllum tilvikum hafi verið reynt að fela að um afskornar rósir væri að ræða. Þá voru rósirnar ýmist dulbúnar sem silfurtré eða eitthvað allt annað.

Samkvæmt íslenskum tollalögum skal sá sem veitir rangar upplýsingar vegna innflutnings sæta sektum. Hafi brot verið ítrekað getur það hins vegar varðað allt að sex ára fangelsi.