Náðu tveimur lykilborgum í kvöld

Þær tvær sem þeir náðu í kvöld, Kandahar og Herat, eru þær stærstu sem talibanar hafa náð á sitt vald hingað til í stríði sínu við stjórnar­her Afgan­istan. Til við­bótar náðu þeir borginni Ghazni á sitt vald í morgun, sem AP frétta­veitan segir að sé afar mikil­væg her­fræði­lega, því hún sker á aðal­leið stjórnar­hersins milli höfuð­borgarinnar og suður­héraða landsins.

Vísir fjallaði ítarlega um stríð talibana og stjórnarhersins í morgun:

Sækja starfsmenn sendiráða

Bæði bresk og banda­rísk stjórn­völd hafa á­kveðið að senda her­lið til höfuð­borgarinnar til að að­stoða starfs­fólk sendi­ráða sinna við að yfir­gefa landið. Um sex hundruð her­menn fara í leið­angurinn frá Bret­landi en um tvö þúsund frá Banda­ríkjunum, sam­kvæmt frétt The Guar­dian.

Þrátt fyrir þetta segja er­lendir miðlar að enn sem komið er eigi af­ganski herinn ekki í hættu á að missa Kabul. Talibanar hafa þó þrengt veru­lega að borginni í nýrri sókn sem þeir hófu í vikunni en þeir ráða nú yfir meira en tveimur þriðju hluta alls land­svæðis Afgan­istan.

Ríkis­stjórnin á að hafa boðið talibönum að ganga að sam­komu­lagi í dag sem myndi felast í því að þeir myndu deila völdum með ríkis­stjórn Ashraf Ghani, for­seta Afgan­istans, og hætta á­tökunum.

Stjórnendur annarrar borgar komust undan

Borgin Herat féll í hendur talibana í kvöld eftir linnu­lausar á­rásir þeirra í tvær vikur. Þeir börðust þar aðal­lega við her­lið stríðs­herrans Is­ma­il Khans, sem styður ríkis­stjórnina, og mætti í borgina til að að­stoða við varnir hennar. Ekki er vitað hvað varð um hann eftir að borgin féll, þegar þetta er skrifað.

Sam­kvæmt AP komust héraðs­stjóri Kandahar og aðrir stjórnar­menn borgarinnar úr borginni með flugi til Kabul áður en hún féll í hendur talibana í kvöld.

Hér má sjá kort frá AFP fréttaveitunni síðan í morgun sem sýnir þróun síðustu vikna: