Vantaði bara eina stoðsendingu til að ná meti pabba síns

Dagur Kár var með 21 stig og 13 stoðsendingar í 101-89 sigri Grindavíkurliðsins en alls skilaði hann 33 framlagsstigum til síns liðs.

Dagur Kár setti þarna persónulegt stoðsendingamet í úrslitakeppni en hann var líka mjög nálægt því að jafna félagsmet föður síns Jóns Kr. Gíslasonar.

Jón Kr. er áfram sá Íslendingur sem hefur gefið flestar stoðsendingar í einum leik í úrslitakeppni fyrir Grindavík en sjálft félagsmetið í úrslitakeppni á Warren Peebles sem gaf sextán slíkar í þríframlengdum leik á móti Keflavík árið 1999.

Jón Kr. gaf mest fjórtán stoðsendingar í leik með Grindavík í úrslitakeppni en sá leikur var á móti Skallagrími í Röstinni í Grindavík 9. mars 1997. Dagur Kár var þá nýbúinn að halda upp á tveggja ára afmælið sitt.

Jón Kr. er ansi áberandi á topplistanum en Dagur Kár stakk sér inn á milli nokkra stoðsendingaleikja föður síns með þessari frammistöðu í gær.

Dagur skoraði líka 21 stig í leiknum í gær en pabbi hans var aðeins með þrjú stig þegar hann setti stoðsendingametið.