Á­fram svalt loft yfir landinu og víða nætur­frost

Áfram er háþrýstisvæði og svalt loft yfir landinu og því víða næturfrost. Hiti fer þó upp í tíu stig suðvestanlands að deginum. Norðlæg átt, þrír til tíu metrar á sekúndu og hvassast austast á landinu.

Í hugleiðingum veðurfræðings á vef Veðurstofunnar segir að skýjað verði með köflum og stöku skúrir eða él, en lengst af léttskýjað suðvestan til. Ekki sé að sjá neinar markverðar veðurbreytingar fram að helgi.

Veðurhorfur á landinu næstu daga

Á miðvikudag: Norðlæg átt, 3-10 m/s og bjart með köflum á Suður- og Vesturlandi, en annars skýjað og stöku él. Hiti 0 til 9 stig, hlýjast á SV-landi, en næturfrost í öllum landshlutum.

Á fimmtudag og föstudag: Norðaustan og austan 3-10 m/s og lengst af bjartviðri á Suður og Vesturlandi, en stöku él við S-ströndina. Annars skýjað að mestu og sums staðar dálítil él, einkum til fjalla. Hiti frá frostmarki NA-lands, upp í 8 stiga hita syðst. Næturfrost í öllum landshlutum.

Á laugardag, sunnudag og mánudag: Hæg norðlæg eða breytileg átt og bjart með köflum, en stöku él við A-ströndina. Hiti víða 1 til 6 stig að deginum, en áfram næturfrost.