Sam­herji segir sekt DNB-bankans ekki tengjast við­skiptum sínum

Fréttastofa greindi frá málinu fyrr í dag en DNB sagði upp öllum viðskiptum við Samherja í árslok 2019. Norska fjármálaeftirlitið gagnrýnir bankann harðlega í tilkynningu sem birt var í dag og segir Kjerstin Braathen, forstjóri DNB, bankann taka gagnrýnina „mjög alvarlega.“

Almennt kerfi DNB til að greina peningaþvætti ófullnægjandi

Norska ríkið á 34 prósent hlutafjár í DNB-bankanum og hefur sérstaklega gagnrýnt bankann fyrir að hafa ekki kannað millifærslur milli tveggja fyrirtækja Samherja hjá bankanum eftir að fréttir bárust um starfsemi félagsins í Namibíu.

„Eftir því sem ráðið verður af gögnum var þessi sekt lögð á DNB bankann eftir reglubundið eftirlit með peningaþvættisvörnum bankans í febrúar á síðasta ári. Niðurstaða þeirrar athugunar var að almennt kerfi DNB til að greina hugsanlegt peningaþvætti hafi verið ófullnægjandi,“ segir í yfirlýsingu á heimasíðu Samherja.

„DNB hefur tekið skýrt fram að norska fjármálaeftirlitið saki bankann ekki um að hafa aðstoðað viðskiptavini sína við peningaþvætti heldur sé bankinn sakaður um það að verkferlar bankans hafi almennt ekki fylgt ítarlegri norskri löggjöf um aðgerðir gegn peningaþvætti.“

„Meginefni skýrslunnar um starfshætti bankans en ekki um Samherja“

Samherji segist hafa þrjár athugasemdir við sérstaka skýrslu sem norska fjármálaeftirlitið hefur unnið að um viðskiptasamband DNB-bankans og Samherja en greint var frá henni í dag.

„Í fyrsta lagi ber að geta þess að þótt þessi skýrsla fjalli að nafninu til um samband DNB við Samherja er meginefni hennar um starfhætti DNB bankans sjálfs í ljósi norskrar löggjafar en ekki um Samherja,“ segir í yfirlýsingunni.

„Í öðru lagi er skýrslan ónákvæm. Það kemur ekki á óvart þar sem Finanstilsynet hafði aldrei samband við Samherja og beindi aldrei neinum fyrirspurnum til fyrirtækisins við gerð skýrslunnar. Að öllum líkindum er ástæðan fyrir þessu sú staðreynd að Samherji á enga aðild að þessu máli.“

„Samherji aðeins einn af þessum 400 viðskiptavinum“

Segir í yfirlýsingunni að það sé „mjög óheppilegt“ að skýrsla sem hafi trúnaðarupplýsingar að geyma um þriðja aðila sé gerð opinber áður en fyrirtækið fái tækifæri til að gera athugasemdir við hana. Dæmi um ónákvæmni í skýrslunni, að sögn Samherja, sé sú framsetning að allar greiðslur gegnum bankareikninga í DNB bankanum hafi tengst útgerðinni í Namibíu.

„Þetta er fjarri því að vera rétt enda var mikill meirihluti millifærslna gerður í tengslum við sölu sjávarafurða og skipa víðs vegar um heim. Þar er um að ræða ósköp venjuleg og algjörlega óumdeild viðskipti,“ segir í yfirlýsingunni.

Þá segir Samherji að skýrslan engin áhrif á umrætt mál milli Finanstilsynet og DNB-bankans.

„Sú sektarákvörðun sem beinist að DNB og tilkynnt var um í dag er nákvæmlega sú sama og hin almenna sekt sem lögð var á DNB og greint var frá í desember á síðast ári. Þá tekur norska fjármálaeftirlitið skýrt fram að viðskiptasamband DNB og Samherja sé ekki afmarkað eða einangrað tilvik. DNB bankinn er sektaður vegna þess að bankinn fylgdi ekki ítarlegum reglum um verklag í tengslum við viðskipti allt að 400 viðskiptavina bankans og Samherji er aðeins einn af þessum 400 viðskiptavinum.“