Tugir látnir og um tvö hundruð sitja föst eftir lestar­slys

Samkvæmt breska ríkisútvarpinu lenti lestin á vinnuvél sem hafði runnið út á lestarteinana við munna gangnanna. Ekki liggur fyrir hvernig það atvikaðist að vélin rann út á teinana.

Lestin var á leið frá Taipei, höfuðborg Taívans, til Taitung. Margt fólk var í lestinni þar sem fólk í landinu ferðast nú milli landshluta vegna árlegs vikufrís sem stendur þar yfir.

Talið er að hátt í fimm hundruð manns hafi verið um borð í lestinni og að einhverjir hafi staðið sökum fjölda um borð.

Farþegar öftustu vagnanna komu best undan slysinu og gátu sumir þeirra komist sjálfir út úr lestinni. Um hundrað manns hefur þegar verið bjargað út úr göngunum, en um tvö hundruð eru enn föst þar. Slysið átti sér stað klukkan níu að morgni að staðartíma, eða klukkan eitt í nótt á íslenskum tíma.

Tsai Ing-wen, forseti Taívans, sagði í yfirlýsingu að það væri hið mesta forgangsmál að ná fólki út úr göngunum sem fyrst.