Svona verður skóla­starfi háttað eftir páska

Afléttingin núna byggir á tillögum sóttvarnalæknis sem lagði til að skólar yrðu opnaðir með samskonar takmörkunum og voru í gildi síðasta haust. Reglugerð þess efnis var birt í dag og er gert skil á vef Stjórnarráðsins. Gildistími reglugerðarinnar er frá 1. apríl til og með 15. apríl og var unnin í samstarfi heilbrigðisráðherra og menntamálaráðherra.

Íþróttir barna á leik- og grunnskólaaldri utan skóla verða áfram óheimilar samkvæmt núverandi sóttvarnareglum sem gilda sömuleiðis til 15. apríl.

Eftirfarandi reglur munu gilda um skólastarf:

Leikskólar

Engin fjölda- eða nálægðartakmörkun gildir um börn á leikskólaaldri.

Hámarksfjöldi fullorðinna er 20 manns í rými, en starfsmenn mega fara milli rýma.

Starfsfólk skal virða 2 metra fjarlægðarreglu sín á milli en nota grímu ella.

Viðburðir eru heimilir í skólastarfinu með þátttöku nemenda og starfsfólks en engum utanaðkomandi.

Foreldrar og aðstandendur skulu ekki koma inn í skólabyggingar nema brýna nauðsyn beri til og skulu þá nota andlitsgrímu.

Grunnskólar

Nemendur eru undanþegnir nálægðartakmörkun og grímuskyldu.

Hámarksfjöldi starfsmanna er 20 manns í rými og þeir mega fara milli rýma.

Starfsfólk skal virða 2 metra fjarlægðarreglu sín á milli og gagnvart nemendum en nota grímu ella.

Viðburðir eru heimilir í skólastarfinu með þátttöku nemenda og starfsfólks en engum utanaðkomandi.

Hámarksfjöldi nemenda í rými er 50 og blöndun milli hópa innan sama skóla er heimil.

Tónlistarskólar

Halda skal 2 metra nálægðartakmörkun milli starfsfólks og nemenda. Annars skal nota grímur sé þess kostur.

Hámarksfjöldi nemenda í rými er 50 börn á grunnskólaaldri.

Viðburðir eru heimilir fyrir börn á leik- og grunnskólaaldri með sömu skilyrðum og gildir um skólastarf þeirra.

Einstaklingar fæddir 2004 eða fyrr mega vera að hámarki 20 saman í rými og blöndun er heimil.

Um viðburði fyrir einstaklinga fædda 2004 fer eftir ákvæði um sviðslistir í reglugerð um takmörkun á samkomum vegna farsóttar.

Framhaldsskólar

Hámarksfjöldi nemenda og starfsmanna í rými er 30.

Halda skal 2 metra nálægðartakmörkun milli nemenda og starfsfólks en nota grímu ella.

Blöndun nemenda milli hópa er heimil og starfsfólk má fara milli rýma.

Um viðburði tengda starfi eða félagslífi í framhaldsskóla fer eftir ákvæði um sviðslistir í reglugerð um takmörkun á samkomum vegna farsóttar.

Háskólar

Hámarksfjöldi í kennslustofu og lesrýmum er 50.

Halda skal 2 metra nálægðartakmörkunum milli allra en nota grímu ella.

Blöndun nemenda ekki heimil.

Starfsmenn mega fara milli rýma.

Engir viðburðir eru heimilir í skólabyggingum.