Berki brugðið vegna ásakana um rógsherferð Helgu Guðrúnar

Börkur vísar því alfarið á bug að hann standi á bak við ætlaða „smear campaign“, eins og hann orðar það eða rógsherferð, gegn Ragnari Þór Ingólfssyni formanni VR.

Fréttablaðið greindi frá því í morgun að Ragnar Þór Ingólfsson hafi verið einn þeirra sem grunaður er um veiðiþjófnað í Holtsá, sem er í landi Seðlabankans, með ólöglegri netaveiði. Ragnar Þór hefur greint frá því að hann ætli að stefna Fréttablaðinu vegna málsins og telur einsýnt að þetta sé liður í því að grafa undan sér vegna formannsslags í VR. Þá hefur hann kallað eftir staðfestingu frá lögreglu þess efnis að hann sé ekki sakborningur í málinu. Helga Guðrún Jónasdóttir stjórnmála- og fjölmiðlafræðingur, býður sig fram til formanns stéttarfélagsins VR gegn honum sitjandi formanni.

Meint ófrægingarherferð

Gunnar Smári Egilsson, hugmyndafræðingur Sósíalistaflokksins velkist ekki í vafa um að um þarna sé á ferðinni ófrægingarherferð í tengslum við valdabaráttu innan VR og það sem meira er, hann telur sig vera búinn að finna manninn sem stendur á bak við hana.

„Hversu vitlaus getur ein kosningabarátta verið?“ spyr Gunnar Smári í stuttum pistli sem hann ritar á Facebooksíðu Sósíalistaflokksins. „Heimildir mínar segja að Börkur Gunnarsson, margreyndur kosningastjóri Sjálfstæðisflokksins, stýri kosningabaráttu Helgu Guðrúnar Jónasdóttir í formannskosningunni í VR.“

Gunnar Smári gefur reyndar ekki mikið fyrir hæfileika Barkar á þessu sviði og segir hann meðal annars hafa verið kosningastjóra Sjálfstæðisflokksins í borgarstjórnarkosningunum 2010 þegar fylgi flokksins féll úr 42,9 prósenta fylgi 2006 niður í 33,6 prósent.

Börkur kemur af fjöllum

„Nú veit ég ekki hvort honum datt þessi vitleysa í hug, að reyna að blása upp einskonar kollumál í kringum Ragnar Þór, en Börkur ætti að þekkja þau mál, þegar Sjálfstæðisflokksmenn reyndu að grafa undan Hermanni Jónassyni á kreppuárunum.“

Börkur kom af fjöllum þegar Vísir bar þetta undir hann. Sagðist vissulega þekkja Helgu Guðrúnu, hún væri nágrannakona hans en hann væri enginn kosningastjóri. Hann starfaði sem kennari í fullu starfi. Og hafi fullan hug á að leggja henni lið. Gunnar Smári hefði getað beðið þangað til. Það væri ekkert batterí í kringum hana, kosningabaráttan væri sem stendur rekin við eldhúsborð hennar.

Og hann sagðist ekki einu sinni vita um hvað málið snerist? Netaveiðar Ragnars Þórs? spyr Börkur forviða.

Hinn grimmi Gunnar Smári

„Þetta er pottþétt ekki undan hennar rifjum runnið,“ segir Börkur og spyr hvort blaðamaður Vísis sé ekki að djóka?

„Helga Guðrún er ekki betur tengd í fjölmiðlum en svo að hún kemst ekki að til að fá viðtal og kynna áherslumál sín. Það eru nú öll tengsl hennar inní fjölmiða,“ segir Börkur og honum er augljóslega brugðið. Segir að framboð hennar sé einfaldlega þannig til komið að ýmsir telji VR á rangri leið undir stjórn Ragnars Þórs.

„Svo eru kanónur eins og Gunnar Smári að „smear campaign-a“ hana! Hann lætur allt vaða. Kýlt og sprengjum kastað hægri vinstri. Ég hef alveg séð hvernig hann hefur leikið fólk,“ segir Börkur sem segist eiga erfitt með að skilja þessa grimmd og siðleysið sem felst í ásökunum sem þessum.