„Langstærsti fíkniefnabaróninn á Íslandi“ handtekinn

Samkvæmt heimildum fréttastofu var karlmaður sem situr í gæsluvarðhaldi vegna málsins handtekinn í húsnæði sem hinn meinti fíkniefnabarón hafði til umráða.

Fram kom í gögnum sem lekið var til fjölmiðla og á netið í upphafi árs að karlmaðurinn hefði verið upplýsingagjafi hjá lögreglunni í fjöldamörg ár.

Maðurinn sem skotinn var til bana í Rauðagerði rétt fyrir miðnætti á laugardagskvöld var frá Albaníu en bjó hér á landi með íslenskri eiginkonu sinni og ungu barni. Þau eiga von á öðru barni. Rannsókn málsins beinist meðal annars að því hvort árásin tengist uppgjöri í undirheimunum í tengslum við skipulagða brotastarfsemi.

Skotinn með skammbyssu

Það var aðfaranótt síðastliðinn sunnudags sem lögreglunni á höfuðborgarsvæðinu barst tilkynning um slasaðan mann á fertugsaldri fyrir utan hús í Rauðagerði. Endurlífgunartilraunir hófust strax á vettvangi og í kjölfarið var hann fluttur á Landspítala. Hann var úrskurðaður látinn stuttu eftir komuna.

Um var að ræða fyrrnefndan karlmann frá Albaníu sem bjó í húsinu ásamt konu sinni og barni. Sömu nótt handtók lögregla karlmann á fertugsaldri í Garðabæ. Karlmaðurinn, sem er frá Litháen, var úrskurðaður í gæsluvarðhald til föstudagsins 19. febrúar.

Lögregla hefur haldið þétt að sér spilunum við rannsókn málsins og lítið sem ekkert viljað segja. Heimildir fréttastofu herma að hinn látni hafi verið skotinn nokkrum sinnum með skammbyssu, meðal annars í höfuðið.

Óvíst með gæsluvarðhald

Greint var frá því í kvöldfréttum Stöðvar 2 í gærkvöldi að íslensks karlmanns væri leitað í tengslum við rannsókn á málinu. Samkvæmt heimildum fréttastofu er um að ræða rúmlega fertugan karlmann sem hefur verið undir smásjá lögreglu um árabil vegna gruns um fíkniefnainnflutning. Hann hefur komist til mikilla efna án skýringa.

Karlmaðurinn var meðal þriggja sem lögregla handtók í umfangsmiklum aðgerðum sínum í gær sem fóru meðal annars fram á Suðurlandi. Fréttablaðið hefur heimildir fyrir því að hinir tveir mennirnir séu útlenskir og allir þrír hafi verið handteknir í húsi rétt fyrir utan Selfoss í nótt í tengslum við morðið. Margeir Sveinsson, yfirmaður miðlægrar rannsóknardeildar lögreglu, tjáði fréttastofu í dag að ekki lægi fyrir hvort farið yrði fram á gæsluvarðhald yfir þremenningunum.

Fyrrnefndur gagnaleki til fjölmiðla og á Internetið í upphafi árs, sem sýndi samskipti karlmannsins við lögreglu sem upplýsingagjafa, vakti mikla athygli. Ekki liggur fyrir hver lak upplýsingunum til fjölmiðla og á Internetið en héraðssaksóknari hafði málið til skoðunar í janúar. 

Um er að ræða rannsóknargögn í máli lögreglufulltrúa hvers heilindi fjöldi lögreglumanna efuðust um. Gögnunum virðist hafa verið lekið af óvildarmanni upplýsingagjafans. Óvildarmaðurinn fullyrti, í nafnlausu erindi sem fylgdi gögnunum, að hinn meinti fíkniefnabarón hefði um árabil fengið friðhelgi frá yfirvöldum við vinnu sína í undirheimum.