Elín Jóns­dóttir deildar­for­seti nýrrar laga­deildar á Bif­röst

Elín hefur þegar hafið störf sem forseti lagadeildar en deildin sjálf tekur til starfa frá og með næsta hausti.

Elín er lögfræðingur frá Háskóla Íslands með LL.M. gráðu frá Duke-háskóla í Bandaríkjunum og MBA-gráðu frá Viðskiptaháskólanum í Stokkhólmi, auk prófs í verðbréfaviðskiptum. Hún hefur starfað við lögfræði og stjórnun og hefur m.a. verið framkvæmdastjóri eignastýringarsviðs Íslandsbanka, forstjóri Bankasýslu ríkisins og framkvæmdastjóri verðbréfafyrirtækisins Arev, er segir á vef Háskólans á Bifröst.  

Þá hefur Elín viðamikla reynslu af stjórnarstörfum m.a. sem stjórnarformaður Tryggingarmiðstöðvarinnar, Regins fasteignafélags og Borgunar. Elín situr nú í stjórn Borgunar hf., Skeljungs hf., og Arnrúnar ses., sem er byggingarfélag Kvennaathvarfsins.

Vill sækja fram

Haft er eftir Elínu í tilkynningu að sú ákvörðun að koma aftur á fót sérstakri lagadeild sýni að rektor og stjórn hafi mikla trú á deildinni og vilji tryggja vöxt hennar og viðgang. Lagadeild og félagsvísindadeild skólans voru sameinaðar árið 2017. 

„Fræðigreinin fær við það meiri áherslu í starfi innan skólans og stuðningur við nemendur og kennara eykst,“ segir Elín.

„Að mínu mati er Háskólinn á Bifröst í góðri stöðu til að sækja fram og styrkja laganámið nú þegar líður að tuttugu ára afmæli laganáms við skólann. Lögfræðinám við Bifröst hefur frá upphafi haft skýra aðgreiningu í flóru þeirra háskóla sem kenna lögfræði hér á landi. Þá vísa ég bæði til samstarfsins við viðskiptadeild varðandi námsframboð og til þess fjölbreytta nemendahóps sem skólinn þjónar með fjarkennslu.“