Skoðar mál fanga sem liggur al­var­lega veikur á gjör­gæslu

Dómsmálaráðuneytið skoðar nú mál fanga sem liggur alvarlega veikur á gjörgæsludeild en hann var fluttur með sjúkrabíl frá fangelsinu á Hólmsheiði á Landspítalann 8. nóvember síðastliðinn og hefur legið þar þungt haldinn síðan.

Fréttablaðið fjallar um málið í dag. Þar segir að manninum hafi verið haldið sofandi í öndunarvél í tíu daga en hann var vakinn á miðvikudag og sýnir nú hægfara batamerki samkvæmt heimildum blaðsins.

Aðstandendur mannsins eru ósáttir við hvernig tekið var á veikindum mannsins í fangelsinu og telja fangaverði ekki hafa sinnt óskum hans um læknisaðstoð.

Áslaug Arna Sigurbjörnsdóttir dómsmálaráðherra segir í samtali við blaðið að ráðuneytinu sé kunnugt um málið og að óskað hafi verið eftir nánari upplýsingum frá fangelsisyfirvöldum.

Í blaðinu er einnig rætt við Pál Winkel forstjóra Fangelsismálastofnunar sem segir að engum fanga sé neitað um heilbrigðisþjónustu en hann tjái sig þó ekki um málefni einstakra fanga.