Frá Össuri til Alvotech

Lyfjafyrirtækið Alvotech hefur ráðið Rakel Óttarsdóttur sem framkvæmdastjóra upplýsingatæknisviðs.

Í tilkynningu segir að hún muni bera ábyrgð á upplýsingatæknimálum fyrirtækisins og verði hluti af framkvæmdastjórnarteymi Alvotech.

„Rakel kemur frá Össuri en þar starfaði hún sem yfirmaður upplýsingatæknimála. Áður starfaði Rakel hjá Arion banka í um 14 ár, þar sem hún var meðal annars framkvæmdastjóri upplýsingatæknisviðs og framkvæmdastjóri þróunar- og markaðssviðs.

Rakel tekur við starfinu af Guðmundi Óskarssyni framkvæmdastjóra upplýsingatæknisvið Alvotech og Alvogen, sem nú kveður eftir árangursríkt og skilvirkt uppbyggingarstarf undanfarinna sjö ára hjá félögunum,“ segir í tilkynningunni. 

Þá kemur fram að Rakel sé með B.Sc. í tölvunarfræði frá Háskóla íslands (1997) og MBA gráðu frá Duke University (2002). Hún sé gift Gísla Óttarssyni verkfræðingi og meðal áhugamála Rakelar séu ferðalög, veiði og skíði.