Störfum í hátæknivöruhúsi fækkar en ný störf verða til

„Störfum í vöruhúsi fækkar umtalsvert þar sem talsvert færri starfsmenn þarf til að sinna verkefnum í sjálfvirku vöruhúsi heldur en í hefðbundnu vöruhúsi,“ segir Jóhanna Þ. Jónsdóttir framkvæmdastjóri aðfangakeðju Innnes um nýtt hátæknivöruhús sem Innnes er nú að taka í gagnið. En ný störf verða líka til segir Jóhanna: 

„Á móti kemur að það hafa skapast ný störf sem felast í því að reka sjálfvirku lausnirnar og hafa starfsmenn í vöruhúsi til dæmis þróast í tæknistörf sem ekki voru til áður.“

Í Atvinnulífinu á Vísi hefur nokkuð verið fjallað um hvernig stafræn þróun leysir ýmiss verkefni og störf að hólmi. Á móti kemur hafa fræðimenn bent á að með umbreytingum fjórðu iðnbyltingarinnar, verða einnig til ný störf. 

Dæmi um slíka þróun er breytt starfsemi vöruhús Innnes, sem nú er staðsett í Kornagörðum 3. Að sögn Jóhönnu fólst mikil hagræðing í flutningum vöruhússins því áður var það rekið í þremur húsnæðum í Grafarvogi, sem telst ekki beint alfaraleið. Fyrir viðskiptavini hefur dreifileiðin því styst verulega.

En í hverju er breytingin helst fólgin þegar hátæknivöruhús er tekið í gagnið í stað hefðbundins vöruhúss?

„Í vöruhúsi skiptir hraði í tínslu pantana höfuð máli til þess að koma pöntunum sem fyrst til viðskiptavina og er því mikilvægt að auðvelt sé að ná til vörunnar, ekki sé verið að sækja vörur í 3ju og jafnvæl 4 hæð sem tefur gríðarlega fyrir. Takmarkandi þáttur í tínslu er einnig að einungis er hægt að tína á eitt til tvö vörubretti í hverri ferð og leiðir það þess að sífellt er verið að leggja af stað til að hefja nýja tínslu.  Þetta leiðir til þess að hver staðsetning í vöruhúsi er mögulega heimsótt mörgum sinnum á dag til þess að tína vörur í pantanir,“ segir Jóhanna.

Í hátæknivöruhúsi breytist þetta hins vegar verulega, hraði eykst og ekki þarf lengi að keyra fram og til baka um húsnæðið. Þá skiptir hæð ekki eins miklu máli áður, en í hefðbundnum vöruhúsum er oftast miðað við 10-12 metra lofthæð þannig að lyftari geti með góðu móti sótt bretti úr rekkum.

Sjálfvirk vöruhús eru hins vegar mannfærri en hefðbundin vöruhús og leysa róbótar og færibanda kerfi erfiðustu verkefnin. Við vörumóttöku er bretti skannað og sett á færiband sem flytur brettið til geymslu í 35 metra hátt rekkakerfi þar sem róbótar taka við því og sjá um að flytja þau til geymsluhólf. Þar er brettið geymt þar til eftirspurn verður eftir því,“ 

segir Jóhanna.

Betri aðstaða fyrir starfsfólk og ný störf

Afköst aukast því nú er vöruhúsið ekki lengur háð getu starfsfólks á vöktum, heldur reglubundnu viðhaldi búnaðarins. 

Ný störf skapist til að mynda við þetta viðhald á búnaði.

Að sögn Jóhönnu er hátækni vöruhúsið hannað með vinnuvistfræði í huga. Það þýði að hönnun reynir að tryggja rétta líkamsbeitingu starfsmanna við vinnu.

Þá segir hún tæknina draga úr líkum á mannlegum mistökum við skráningu og rýrnun vara minnkar. En fleira telst til sem kemur starfsfólki til góða.

Að auki er reynslan erlendis að minna er um vinnuslys og heilsufarsleg vandamál við öruggari vinnuaðstæður fyrir vöruhúsastarfsfólkið,“ 

segir Jóhanna.

Jóhanna er bjartsýn á þær hagræðingar sem nýja hátæknivöruhúsið mun skila. Hún segir hins vegar að smæð Íslands hafi kallað á að þau hafi þurft að púsla svolítið saman ólíkum sjálfvirkum lausnum því markaðurinn hér heima er bæði smærri og öðruvísi en víðast hvar erlendis. Hér heima séu vöruhús oft að þjóna bæði í brettavís og í stykkjatali. Erlendis séu markaðir stærri og vöruhús því oft sérhönnuð til að þjóna annað hvort stærri eða smærri aðilum.