Steph Curry að snúa aftur

Stephen Curry er byrjaður að æfa aftur með liðsfélögum sínum í Golden State Warriors í fyrsta sinn í fjóra mánuði, en hann handleggsbrotnaði í október síðastliðnum. Þetta eru gleðitíðindi fyrir Golden State.

Golden State hefur komist í úrslitin í NBA-deildinni síðustu fimm ár og orðið meistarar þrisvar á því tímabili. Núna situr liðið hinsvegar í neðsta sæta Vesturdeildarinnar og nokkuð ljóst að þeir taka ekki þátt í úrslitunum í vor. 

Liðið varð fyrir áfalli í lok síðasta tímabils þegar Klay Thompson meiddist illa á hné og var strax sagður frá keppni í langan tíma. Það hefur verið staðfest að hann muni ekkert spila á þessu tímabili. Í ofanálag handleggsbrotnaði Steph Curry í byrjun þessa tímabils og hefur ekki spilað síðan í 4. umferð. Síðan þá hefur Golden State aðeins unnið 11 leiki.

Nú er sagt að Curry gæti mögulega tekið þátt í leik Warriors gegn Washington Wizards annað kvöld. 

Það er heldur betur léttir fyrir aðdáendur Golden State-liðsins sem hafa mátt þola frekar dapurt tímabil hingað til. Curry hefur tvisvar verið valinn verðmætasti leikmaður tímabilsins í NBA, árin 2015 og 2016. Þá var hann stigahæstur í deildinni 2016 og hefur þrisvar sinnum verið valinn í úrvalslið deildarinnar og sex sinnum í stjörnuleikinn.

,,Síðustu 20 leikir tímabilsins eru mikilvægir fyrir okkur,‘‘ sagði Steve Kerr, þjálfari Golden State. Við þurfum að leggja góðan grunn að næsta tímabili og byggja upp liðsanda. Þess vegna er mikilvægt fyrir Curry að koma inn núna.‘‘

,,Aðstoðarþjálfarinn sagði að við ættum að spila ,,Joy to the World‘‘ þegar hann snýr aftur. Hann er einhver leikglaðasti körfuboltamaður sem ég hef umgengst og það smitar út frá sér. Þjálfararnir eru allir brosandi á meðan þeir fylgjast með honum æfa skotin sín,‘‘ sagði Kerr kátur.