Dóttir LeBron James fékk hann til að velja númer Gigi Bryant

LeBron James fer ekkert í felur með það að allir leikirnir sem eru eftir á þessu tímabili munu reyna mikið á tilfinningar hans og annarra eftir að Kobe Bryant og dóttir hans fórust í þyrluslysi ásamt sjö öðrum.

Einn af þessum leikjum verður Stjörnuleikurinn í Chicago seinna í þessum mánuði þar sem Kobe Bryant og Gigi Bryant verður minnst alla helgina.

LeBron James fékk flest atkvæði í kjörinu á leikmönnum í Stjörnuleikinn og mun kjósa í sitt lið á móti Giannis Antetokounmpo hjá Milwaukee Bucks.

Allir leikmenn í leiknum munu verða með sama númer því leikmenn annars liðsins verða númer 24 til heiðurs Kobe Bryant en leikmenn hins liðsins verða númer 2 til heiðurs Gigi Bryant.

LeBron James said his daughter, Zhuri, is the reason his team will wear Gianna Bryant's No. 2 in this month's #NBAAllStar game. https://t.co/FfPvVxLfMJ

— ESPN5 (@Sports5PH) February 4, 2020

LeBron James sagði að NBA hafi haft samband við sig í síðustu viku og hann beðinn um að velja númer fyrir sitt lið. LeBron valdi númer 2. En af hverju að velja ekki númer Kobe Bryant?

„Vegna Zhuri,“ svaraði LeBron James en Zhuri er fimm ára dóttir hans.

LeBron James hefur talað um það að hafa tekið eftir því hversu Kobe Bryant naut sín vel í föðurhlutverkinu.

„Ég held að hann hafi aldrei verið ánægðari en þessi síðustu þrjú ár og ég held að við getum öll verið sammála því. Hann var svo ánægður að geta eytt tíma með dætrum sínum og fjölskyldunni,“ sagði LeBron James.

„Við sjáum myllumerkið „girldad“ (stelpupabbi). Ég er stelpupabbi. Bróðir minn mér við hlið [Anthony Davis] er líka stelpupabbi,“ sagði LeBron James.

Kobe Bryant eignaðist fjórar stelpur en LeBron James á þrjú börn. Tvo stráka sem eru fæddir 2004 og 2007 og svo Zhuri sem er fædd árið 2014.