Birta leið­beiningar um hvernig megi helst forðast Wu­han-veiru­smit

Landspítalinn hefur í samstarfi við Alþjóðaheilbrigðismálastofnunina (WHO) gefið út leiðbeiningar um hvernig best sé draga úr sýkingarhættu vegna Wuhan-veirunnar svokölluðu.

Tilmælunum er ætlað að hjálpa almenningi og ferðamönnum að draga úr líkum á alvarlegum veikindum og fækka smitleiðum. Lögð er áhersla á handhreinsun og hreinlæti í kringum augu, nef og munn ásamt öruggri meðferð fæðu.

Lesa má umræddar leiðbeiningar í heild sinni hér fyrir neðan:

• Hreinsið hendur oft og reglulega; notið heitt vatn og sápu - einnig handspritt ef kostur er.
• Hóstið og hnerrið í krepptan olnboga eða í pappír (eldhúss- eða klósettpappír) og hendið pappírnum strax að notkun lokinni.
• Gætið hreinlætis kringum augu og öndunarveg; munn og nef.
• Forðist náið samneyti við fólk sem er með hita eða hósta eða augljós flensueinkenni.
• Reynið sjálf að komast hjá ferðalögum ef veikindi af þessu tagi eru til staðar.
• Ef þið eruð með háan hita eða þungan hósta eða finnið fyrir öndunarerfiðleikum leitið þá til læknis þegar í stað og greinið frá nýlegum ferðalögum, hafi einhver verið.
• Munið að hringja á viðkomandi heilbrigðisstofnun eða í símanúmerið 1700 (Ísland) áður en farið er þangað svo hægt sé að gera ráðstafanir þar til að forðast smit.
• Forðist alla óvarða snertingu við villt dýr og húsdýr á landsvæðum þar sem kórónaveiran hefur greinst.
• Á ferðalögum um þekkt smitsvæði kórónaveiru ætti fólk að forðast hráar eða lítið eldaðar dýraafurðir. Það á einkum við um hrátt kjöt, mjólk og innyfli dýra.
• Mikilvægt er að gæta ítrustu varúðar við eldamennsku á smitsvæðum þar sem kórónaveira hefur greinst.
  
  

Helstu einkenni líkist inflúensusýkingu

Frekari upplýsingar um veiruna má finna á vef Landspítalans þar sem greint er frá því að einkenni hennar líkist helst inflúensusýkingu. Ber þar helst hósti, hiti, bein- og vöðvaverkir, þreyta o.s.frv. Veiran getur einnig valdið alvarlegum veikindum með neðri öndunarfærasýkingum og lungnabólgu, sem koma oft fram sem öndunarerfiðleikar á 4-8 degi veikinda.

Ef einstaklingar finna fyrir veikindum er þeim bent á að hringja í síma 1700 (fyrir erlend símanúmer +354 544-4113) varðandi nánari upplýsingar og hvernig þeir eigi að nálgast heilbrigðiskerfið. Þessir einstaklingar eru sérstaklega beðnir um að mæta ekki á bráðamóttöku sjúkrahúsa eða á heilsugæslustöðvar nema að fengnum ráðleggingum í síma.

Ekki talin ástæða til að hvetja til ferðabanns

Wuhan-veiran er ný tegund kórónaveiru og ber formlega heitið 2019-nCoV. Hátt í níu þúsund einstaklingar hafa nú greinst með veiruna, nær allir í Kína. Veiran hefur ekki hlotið eiginlegt nafn af hálfu Alþjóðaheilbrigðismálastofnunarinnar og hefur hún því ýmist gengist undir nafninu kórónaveiran, nýja kórónaveiran eða verið kennd við kínversku borgina Wuhan, þar sem veiran er talin hafa átt upptök sín.

Samkvæmt Embætti landlæknis er ekki ástæða að sinni til að hvetja til ferðabanns til eða frá Kína en ferðamenn eru þó hvattir til að sleppa ónauðsynlegum ferðalögum um þau svæði Kína þar sem faraldur geisar og huga vel að sýkingavörnum á ferðalögum almennt.

Samhæfingarstöð almannavarna í Skógarhlíð hefur verið virkjuð við áætlanagerð vegna faraldursins.