Vara við miklu hvassviðri á norðanverðu Snæfellsnesi í kvöld

Veðurstofan segir að búast megi við staðbundnu hvassviðri á norðanverðu Snæfellsnesi í kvöld og að í hviðum verði vindur allt að 30 metrar í sekúndu. Skilyrði fyrir ökutæki sem taka á sig mikinn vind séu því varasöm.

Í hugleiðingum veðurfræðings segir að lægð sem sé að myndast og dýpka á vestanverðu Grænlandshafi muni dæla til okkar röku og hlýju loft næsta sólarhringinn með tilheyrandi sunnanátt og vætu. Á það sérstaklega við um landið vestanvert og sunnanvert í kvöld og á morgun.

„Það hvessir seinnipartinn og í kvöld, víða strekkings suðaustanátt en þó má reikna með staðbundu hvassviðri á norðanverðu Snæfellsnesi. Þessar aðstæður geta verið varasamar fyrir t.d. bíla með hjólhýsi eða tjaldvagna. Rólegra veður tekur síðan við á þriðjudag og útlit fyrir prýðisveður á öllu landinu á 17. júní.“

Veðurhorfur á landinu næstu daga

Á mánudag: Sunnan og suðvestan 5-13 m/s með rigningu, einkum S-lands. Dregur úr úrkomu V-til með morgninum. Hiti 8 til 18 stig, hlýjast norðaustanlands.

Á þriðjudag: Suðvestlæg átt, 3-10, skýjað og smáskúrir, en bjart með köflum suðaustantil. Hiti 8 til 15 stig.

Á miðvikudag (lýðveldisdagurinn): Suðlæg átt, 3-8 m/s, skýjað með köflum og þurrt. Þokubakkar við N- og A-ströndina. Hiti 8 til 16 stig, hlýjast fyrir norðan.

Á fimmtudag: Suðaustanátt, skýjað og smáskúrir sunnan- og vestanlands, en bjart með köflum norðaustanlands. Hiti 8 til 18 stig, hlýjast á Norðausturlandi.

Á föstudag: Suðaustlæg átt og lítilsháttar væta SA-lands, en annars þurrt að kalla. Hiti breytist lítið.

Á laugardag (sumarsólstöður): Útlit fyrir austlæga átt með lítilsháttar vætu og milt í veðri.