Á­kærður fyrir að sparka í and­lit lög­reglu­manns og hóta honum líf­láti

Embætti héraðssaksóknara hefur ákært karlmann á þrítugsaldri fyrir að hafa sparkað í andlit lögreglumanns og hótað honum lífláti við handtöku. Málið er þingfest í Héraðsdómi Reykjavíkur í dag.

Atvikið átti sér stað í Grafarvogi í Reykjavík síðasta sumar þar sem ákærði veitti „kröftuga mótspyrnu“ þar sem verið var að handtaka hann.

Í ákæru segir að lögreglumaðurinn hafi hlotið eymsli í andliti, áverka á báðum hnjám og tognun á vinstra hné. Þá hafi maðurinn hótað lögreglumanninum lífláti með orðinum: „Djöfull skal ég finna þig og drepa þig“.

Þá hafi ákærði hótað sama lögreglumanni líkamsmeiðingum eftir að á lögreglustöð var komið þar sem hann sagði „Ég skalla þig“ og í kjölfarið gert tilraun til að skalla lögreglumanninn.

Þess er krafist að maðurinn verði dæmdur til refsingar og greiðslu alls sakarkostnaðar.