Kasólétt Anníe Mist ætlar að gera Murph-æfinguna sem „felldi“ hana á heimsleikunum

Íslenska CrossFit goðsögnin Anníe Mist Þórisdóttir ætlar ekki að láta sitt eftir liggja á „Memorial Day“ í dag og hefur tilkynnt það að hún ætli að taka Murph-æfingu eins og svo margir í CrossFit heiminum gera á þessum síðasta mánudegi í maímánuði.

Anníe Mist Þórisdóttir er að verða komin sjö mánuði á leið en heldur áfram að æfa á hverjum degi. Hún hefur vissulega gert smá tilfærslur á því hvernig hún æfir en æfingar eru alls ekki einhver göngutúr í garðinum. Anníe Mist er enn að æfa á fullu og sannar það með myndböndum sínum.

Anníe Mist leyfir aðdáendum sínum að fylgjast með sér æfa á samfélagmiðlinum Instagram og þar hafa þeir einnig séð bumbuna stækka og stækka.

Anníe Mist boðaði það á Instagram í gær að hún ætlar eins og svo margir í CrossFit heiminum að taka Murph-æfingu í dag í tilefni dagsins. Murph æfingin er ein sú þekktasta í CrossFit heiminum enda fjölbreytileg æfing sem reynir mikið á þá sem reyna við hana.

Anníe Mist gerir smá breytingar á hefðbundinni Murph-æfingu eins og sem dæmi að skipta hlaupum út fyrir það að hjóla en hér fyrir neðan fer hún yfir æfingu sína í dag.

Í dag er Memorial Day sem er frídagur í Bandaríkjunum og helgaður minningu þeirra sem fallið hafa í herþjónustu. Það er mikil hefð fyrir því í CrossFit heiminum að skella í eina veglega Murph-æfingu á þessum degi en æfingin er skírð eftir bandaríska liðsforingjanum Michael P. Murphy.

Það er ekki nóg með að CrossFit fólkið þurfi þar að hlaupa, hoppa, beygja, lyfta og enda allt saman á að hlaupa aftur þá er þessi mikla þolæfing gerð í þyngingarvesti til að gera allt saman enn erfiðara.

„Murph æfing á morgun. Sama þótt að mörg ykkar haldi annað þá er ég hrifinn af þessari æfingu. Ég hef ekki átt sem besta upplifun af þessari æfingu á heimsleikunum en það var meira veðrinu að kenna frekar en sjálfri æfingunni,“ skrifaði Anníe Mist Þórisdóttir á Instagram.

Anníe Mist var þarna að vísa í Murph æfingu sína á heimsleikunum árið 2015 en hún fékk þá í hitaslag í æfingunni. Anníe Mist sýndi ótrúlegan viljastyrk með að reyna að halda áfram en þurfti síðan seinna að draga sig úr keppni þar sem hún glímdi við eftirmála þess.