Bað alla afsökunar á fíflaskapnum hjá sér

NBA stjarnan Rudy Gobert hneykslaði mjög marga með framkomu sinni fyrr í vikunni þegar hann gerði grín að smithættu vegna kórónuveirunnar með því að snerta alla hljóðnema á blaðamannafundi en aðeins tveimur dögum seinna greindist hann með kórónuveiruna.

NBA-deildin frestaði öllum leikjum í deildinni eftir að fréttist af smiti Rudy Gobert þar á meðal einum leik þar sem liðin voru að hita upp og allir áhorfendur mættir.

Rudy Gobert sér mikið eftir öllu saman og bað alla afsökunar í pistli á Instagram enda hefur hann með hegðun ógnað heilsu margar þar á meðal liðsfélaga sinna og fjölskyldum þeirra.

„Það fyrsta og mikilvægasta er að ég vil biðja alla opinberlega afsökunar á því að hafa ógnað heilsu þeirra með hegðun minni,“ skrifaði Rudy Gobert á Instagram síðu sina.

„Á þeirri stundu hafði ég enga hugmynd að ég væri einu sinni smitaður. Ég var kærulaus og ætla ekki að koma með neinar afsakanir. Ég vona að saga mín verði viðvörun til annarra og sjái til þess að allir taki þessari ógn alvarlega. Ég vil gera allt mitt til að sýna öllum stuðning og mun nota mína reynslu til að fræða aðra og koma í veg fyrir útbreiðslu vírussins,“ skrifaði Gobert.

Donovan Mitchell, liðsfélagi Rudy Gobert hjá Utah Jazz, er einnig kominn með kórónuveiruna og þá fréttist það úr búningsklefa Utah liðsins að Rudy Gobert hafi haldið áfram að gera lítið úr smithættunni þar með því að snerta liðsfélaga sína og þeirra eigur.

Rudy Gobert, sem er frábær miðherji og hefur tvisvar sinnum verið kosinn besti varnarmaður deildarinnar, segir að hann muni ná sér að fullu af kórónuveirunni.