Sam­einuðu þjóðirnar á­lykta gegn Mjanmar

Allsherjarþing Sameinuðu þjóðanna samþykkti í gær ályktun um að fordæma mannréttindabrot Mjanmar gegn Róhingja múslimum og öðrum minnihlutahópum í Mjanmar.

Í ályktuninni er Mjanmar einnig krafið um að hætta að hvetja til ofbeldis og haturs gegn Róhingjum og öðrum minnihlutahópum.

Þúsundir Róhingja voru drepnir og meira en 700 þúsund flúðu til Bangladess eftir að mjanmarski herinn gerði atlögu að þjóðinni árið 2017. Stór meirihluti mjanmörsku þjóðarinnar er Búddatrúar og hafa Róhingjar, sem aðhyllast íslamstrú, lengi orðið fyrir aðkasti frá meirihlutanum.

Mjanmörsk yfirvöld hafa ítrekað haldið því fram að atlagan að þjóðinni hafi verið gerð vegna hættu sem stafaði af öfgahópum Róhingja.

Fyrr í þessum mánuði neitaði Aung San Suu Kyi, leiðtogi landsins, ásökunum um þjóðarmorð fyrir dómi Alþjóðadómstólsins. Mjanmörsk stjórnvöld voru kærð fyrir þjóðarmorð fyrir Alþjóðadómstólnum í byrjun nóvember síðastliðinn vegna aðfarar þeirra gegn Róhingjum.

Segir ályktunina hræsni

Í ályktuninni sem var samþykkt í gær lýstu Sameinuðu þjóðirnar yfir miklum áhyggjum vegna flóttamannastreymis Róhingja síðustu fjóra áratugi til Bangladess „í kjölfar grimmdarverka sem framkvæmd hafa verið af hersveitum Mjanmar.“

Þá var bent á niðurstöður alþjóðlegrar sendinefndar í Mjanmar en þar kom fram að „brotið hafi verið hrottalega á mannréttindum Róhingja og annarra minnihlutahópa“ af mjanmarska hernum sem sendinefndin lýsti sem „alvarlegasta glæps sem heyrir undir alþjóðleg lög.“

Sjá einnig: Stjórnvöld í Mjanmar ­kærð fyrir þjóðar­morð



Mjanmar var beðið um að vernda alla hópa og að tryggja að réttlætinu yrði framgengt í öllum mannréttindabrotamálum. Ályktunin var samþykkt með yfirburðum en 134 af 193 löndum kusu með henni, níu gegn og 28 voru fjarverandi á fundinum.

Ályktanir sem samþykktar eru á Allsherjarþingi Sameinuðu þjóðanna eru ekki lögbundnar en geta haft gríðarleg áhrif á alþjóðasamfélagið.

Hau Do Suan, sendiherra Mjanmar hjá Sameinuðu þjóðunum, sagði ályktunina annað klassískt dæmi um hræsni og óréttláta beitingu á mannréttindasjónarmiðum. Þá sagði hann að ályktunin væri til þess gerð að beita Mjanmar pólitískum þrýstingu en hann bauð enga lausn á „hinni flóknu stöðu í Rakhine héraði.“

Gambía lagði fram kæruna gegn Mjanmar fyrir hönd Félags um íslamskt samstarf (e. Organization of Islamic Cooperation) í byrjun nóvember.

Aung San Suu Kyi, forseti Mjanmar og handhafi friðarverðlauna Nóbels, sagði þegar hún kom fyrir dóminn fyrr í þessum mánuði að málið gegn Mjanmar væri rangt og segði ekki alla söguna. Hún sagði einnig að átökin í Rakhine, þar sem Róhingjar bjuggu, séu aldagömul.

Þá sagði hún að átökin hafi komið til vegna skæruárása Róhingja á varðstöð yfirvalda. Hún viðurkenndi þó að mjanmarski herinn hafi kannski beitt óþarfa ofbeldi á tímum en hún sagði að ef hermenn hafi gerst sekir um stríðsglæpi yrðu þeir leiddir fyrir dóm.

Ekki einn flóttamaður hefur snúið aftur heim

Hundruð þúsunda Róhingja flúðu Mjanmar í kjölfar árásanna og gera enn í dag. Þann 30. september voru 915 þúsund Róhingjaflóttamenn í búðum í Bangladess og höfðu nærri 80% þeirra komið til Bangladess á milli ágúst- og desembermánaða árið 2017. Bangladess gaf það út í mars á þessu ári að landið gæti ekki tekið við fleiri flóttamönnum.

Í ágúst hófst verkefni í Bangladess sem hjálpar Róhingjum að flytja aftur til Mjanmar ef þeir vilja en ekki ein manneskja hefur ákveðið að fara aftur til Mjanmar.

Nú áætlar Bangladess að flytja minnst hundrað þúsund flóttamenn til Bhasan Char, lítillar eyju í Bengalflóa, en 39 hjálpar- og mannréttindasamtök hafa mótmælt hugmyndinni.