Fimm fyrirtæki vilja byggja nýjan Landspítala við Hringbraut

Opnaðar hafa verið umsóknir hjá Ríkiskaupum í forvali vegna uppsteypu á nýjum meðferðarkjarna við Hringbraut sem er stærsta byggingin í Hringbrautarverkefninu, eða um 70.000m². Þetta kemur fram í tilkynningu frá spítalanum.

Þátttökubeiðnir bárust frá eftirtöldum aðilum:

Eykt ehf

Íslenskir aðalverktakar hf

Ístak hf

Rizzani De Eccher Island ehf

ÞG verktakar ehf

Engin takmörkun var á fjölda bjóðenda.

Eftir yfirferð forvalsgagna verða niðurstöður kynntar þann 6. janúar næstkomandi.

Meðferðarkjarninn er stærsta byggingin á skipulagsreit Hringbrautarverkefnisins og í henni verður þungamiðjan í starfsemi Landspítalans. Gerðar hafa verið sambærilegar kröfur um aðbúnað í meðferðarkjarna og í nýjum háskólasjúkrahúsum í nágrannalöndum okkar.

Meðferðarkjarninn er hugsaður út frá starfsemi bráða- og háskólasjúkrahúss, með áherslu á einfalt og skýrt fyrirkomulag ásamt greiðum leiðum milli starfseininga.