Pósturinn hættir að selja gjafavörur og sælgæti

Frá og með 1. febrúar næstkomandi mun Pósturinn hætta að selja gjafavörur, sælgæti, gos, ritföng og annað slíkt á pósthúsum.

Þetta kemur fram í tilkynningu frá Póstinum. Eftir breytinguna mun fyrirtækið þannig aðeins bjóða upp á vörur sem tengjast starfsemi fyrirtækisins beint líkt og kassa, umslög, aðrar pökkunarvörur og frímerkjavörur sem dæmi.

„Þegar Pósturinn byrjaði á vörusölu á sínum tíma snérist hugmyndafræðin um það að viðskiptavinir gætu fyllt upp í næsta kíló en verðskrá póstfyrirtækja í pakkasendingum er byggð upp á kílóverðum. Það var því talið vera viðbótarþjónusta við viðskiptavini að þeir gætu keypt sælgæti eða aðrar tækifæris vörur til að geta nýtt sendinguna að fullu. Fljótlega var svo byrjað að bæta við öðrum vörum en rekstur pósthúsa var afar þungur á tímabili,“ er haft eftir Birgi Jónssyni, forstjóra Íslandspósts ofh., í tilkynningu.

Hann segir ástæðurnar fyrir þessari ákvörðun tvær. Sú fyrri sé hagræðing og sú síðari sú að þessi vörusala tengist ekki kjarnastarfsemi fyrirtækisins.

„Sú fyrri er sú að það er töluverð hagræðing fólgin í því að hætta vörusölu en mikil umsýsla og utanumhald er í kringum þessar vörur. Önnur ástæðan og í raun sú stærsta er hins vegar sú að vörusalan tengist einfaldlega ekki kjarnastarfsemi fyrirtækisins, við höfum legið undir mikilli gagnrýni vegna þessarar starfsemi og sjáum engan ábata í að vera í henni til framtíðar. Við erum að líta í öll horn rekstrarins í hagræðingarskyni en það er ekki síður mikilvægt að horfa til þess að skapa breiðari sátt um starfsemi fyrirtækisins, við teljum að með þessu skrefi séum við að gera það.“

Mikil hagræðing hefur átt sér stað hjá Íslandspósti undanfarið eftir mikið tap um árabil en greint var frá því í lok nóvember að útlit væri fyrir að reksturinn verði við núllið á næsta ári. Fram kom í svartri skýrslu Ríkisendurskoðunar um rekstur fyrirtækisins fyrr á árinu að þörf væri á að ganga lengra í hagræðingu.

Þá hefur Félag atvinnurekenda lengi gagnrýnt rekstur Íslandspósts, ekki hvað síst út frá samkeppnissjónarmiðum, meðal annars vegna sölunnar á sælgæti og gjafavöru.

Þannig sagði í grein eftir Ólaf Stephensen, framkvæmdastjóra FA, í nóvember í fyrra:

„Þannig er nú hvert einasta pósthús í samkeppni við sjoppur, minjagripabúðir, leikfangaverzlanir og bóka- og ritfangabúðir með umfangsmikilli vörusölu. Pósturinn á prentsmiðju, fraktflutningafyrirtæki og hugbúnaðarfyrirtæki. Hann keppir við einkafyrirtæki í fjölpóstdreifingu, hraðflutningum og gagnageymslu. Hann hefur troðið sér inn á markaði fyrir sendla- og sendibílaþjónustu. Nú síðast hafa margir viðskiptavinir IKEA rekið upp stór augu þegar þeir fá vörur sem þeir hafa keypt á netinu sendar heim til sín í bíl frá ríkinu.“

Fréttin hefur verið uppfærð.