Flugvallarland Hvassahrauns eign Fjáreigendafélags og afkomenda

Einn fárra íbúa Hvassahrauns kveðst ekki hafa flutt þangað til að hlusta á flugvélar en segist þó ekki ætla að hlekkja sig við jarðýtur til að hindra flugvallagerð. Landið sem rætt er um að fari undir flugvöll er í eigu Fjáreigendafélags Reykjavíkur og erfingja frístundabænda, alls á þriðja hundrað einstaklinga. Þetta kom fram í fréttum Stöðvar 2. 

Ríki og borg ætla í sameiningu að fá úr því skorið á næstu tveimur árum hvort Hvassahraun henti undir flugvöll. Á samnefndri eyðijörð er núna þyrping sumarbústaða og íbúðarhúsa í bland við gömul útihús og eyðibýli. 

Byggðin í Hvassahrauni er skilgreind sem frístundabyggð. Þar eru þó lögbýli frá fornu fari og í tveimur húsum á fólk lögheimili. Í öðru þeirra búa þau Róbert Kristjánsson og Arndís Einarsdóttir.

Við spurðum Róbert hvernig honum, sem íbúa Hvassahrauns, litist á að fá flugvöll þar. 

„Mér líst nú ekkert sérlega vel á það. En það er ágætis byggingarland fyrir flugvöll,“ svarar Róbert, sem er múrarameistari að mennt. 

„Hitt er annað mál veður og annað slíkt og það þarf að skoða það. Og ég er ekkert að sjá það að flugvöllurinn komi hérna á meðan ég er lifandi allavega.“ 

-En myndir þú hlekkja þig við jarðýtur ef menn færu að gera hérna flugvallarstæði?

„Nei, ég geri það ekki. Ég ætla að gera eitthvað annað skemmtilegra en það,“ svarar Róbert.

Landið sunnan Reykjanesbrautar, sem heppilegast þykir undir flugvöll, er allt í eigu félagsins Sauðafells, alls rúmlega tvöþúsund hektarar. Sauðafell var stofnað árið 1957 af Fjáreigendafélagi Reykjavíkur um kaup á beitilandi í Hvassahrauni fyrir kindur reykvískra frístundabænda, að sögn Ólafs Dýrmundssonar, söguritara félagsins. 

Fjáreigendafélagið á núna 48 prósent í Sauðafelli en hin 52 prósentin eru í eigu afkomenda og dánarbúa 25 fjárbænda, sem allir er látnir. Að Fjáreigendafélaginu standa liðlega eitthundrað manns, þeirra á meðal þeir fáu fjárbændur, sem eftir eru í borgarlandinu, en einnig hestamenn sem komist hafa í félagið í gegnum eignarhald á húseignum í Fjárborg, ofan Geitháls. 

Að sögn Árna Ingasonar, formanns Fjáreigendafélags Reykjavíkur, telst mönnum til að þannig séu hátt á þriðja hundrað manns sem í gegnum félagið Sauðafell teljist eiga hugsanlegt flugvallarsvæði í Hvassahrauni.

Róbert Kristjánsson er þó ekki í hópi landeigendanna í Sauðafelli. En gæti hann hugsað sér að búa áfram í Hvassahrauni með flugbrautir í næsta umhverfi? 

„Ég kom ekki hingað til að hlusta á flugvélar. Ég kom bara til að hlusta á öldurnar og vera með bátinn minn og kajakana og svoleiðis. Geta farið hérna út á miðin og fengið mér fisk, svartfugl og annað.“ 

Hér má sjá frétt Stöðvar 2: