Birta samskipti Ingibjargar og starfsmanns RÚV í aðdraganda húsleitarinnar

Seðlabanki Íslands birti í gær minnisblað, sem innri endurskoðandi bankans tók saman að beiðni seðlabankastjóra um samskipti starfsmanna bankans við Ríkisútvarpið í aðdraganda húsleitar hjá Samherja í mars 2012. Þar eru m.a. birtir tölvupóstar á milli Ingibjargar Guðbjartsdóttur, fyrrverandi framkvæmdastjóra gjaldeyriseftirlits Seðlabankans, og starfsmanns Ríkisútvarpsins.

Í minnisblaðinu, sem fréttastofa Stöðvar 2, Vísis og Bylgjunnar fjallaði um í síðustu viku en hefur ekki áður verið birt opinberlega, er m.a. fjallað um yfirferð á pósthólfi tiltekins starfsmanns. Starfsmaðurinn er ekki nafngreindur en komið hefur fram að þar sé um að ræða Ingibjörgu Guðbjartsdóttur, fyrrverandi framkvæmdastjóra gjaldeyriseftirlits SÍ.

Í minnisblaðinu er staðfest að við yfirferð afrits af tölvupósthólfi Ingibjargar hafi sést samskipti hennar við starfsmann Ríkisútvarpsins á tímabilinu 20. febrúar 2012 til 26. mars 2012, þar á meðal tölvupóstur sem gefur til kynna að Ríkisútvarpið hafi verið upplýst um fyrirhugaða húsleit degi áður en hún hófst.

Þann 20. febrúar 2012 hafi starfsmaður Ríkisútvarpsins óskað eftir fundi vegna skoðunar Kastljóss á viðskiptum „tengdra aðila“ með sjávarafurðir, í bréfinu. Í mörg ár rannsakaði gjaldeyriseftirlitið ætluð brot Samherja á lögum um gjaldeyrismál og lagði á stjórnvaldssektir sem síðar voru endanlega ógiltar með dómi Hæstaréttar í nóvember í fyrra.

Í tölvupóstinum er jafnframt greint frá því að Kastljós hafi í höndum gögn sem þau vilji sýna gjaldeyriseftirlitinu.

„Sá fundur er haldinn þann 21.02.2012. Ekki er tilgreint í gögnum gjaldeyriseftirlitsins hverjir sátu fundinn auk [nafn umrædds starfsmanns] og starfsmanns Ríkisútvarpsins. Fram kemur að farið er yfir upplýsingar starfsmanns Ríkisútvarpsins er varða og að hann afhendir gögn sem vistuð eru í sérstakri möppu á vinnusvæði gjaldeyriseftirlitsins,“ segir í minnisblaðinu.

Þann 26. mars kl. 11:00, að undangengnum tölvupóstssamskiptum frá því í febrúar, sendir starfsmaður Ríkisútvarpsins póst með efnisatriðinu Textinn til Ingibjargar. Þar segir:

Sæl. Hér er textinn, örlítið endurskrifaður. Farðu yfir þetta og láttu mig vita sem allra, allra fyrst.

Kastljós lagði gögn varðandi afurðasölu [nafn útmáð] fyrir gjaldeyriseftirlit Seðlabankans á dögunum og óskaði eftir mati eftirlitsins á því hvort um lögbrot væri að ræða. Forstöðumenn eftirlitsins fengust ekki til að leggja mat á málið á þeim tímapunkti. Eftir því sem næst verður komist hófst þó í framhaldinu rannsókn á málinu sem leiddi til húsleitar á skrifstofum [nafn útmáð] í Reykjavík og á Akureyri í morgun með aðstoð embættis sérstaks saksóknara. Gera má ráð fyrir því að rannsóknin beinist nú að öllum útflutningi [nafn útmáð] síðustu misserin og einnig skilum fyrirtækisins á gjaldeyri til landsins. Rannsókn málsins er sú umfangsmesta í sögu gjaldeyriseftirlitsins.

Klukkan 11:33 sama dag sendi Ingibjörg póst á starfsmann Ríkisútvarpsins með textanum Ertu við? Sem hann svaraði játandi klukkan 11:37. Pósturinn með efnisatriðinu Textinn var í kjölfarið framsendur til starfsmanns Ríkisútvarpsins klukkan 12:09.

Forsætisráðherra hefur vísað máli vegna ætlaðs upplýsingaleka frá Seðlabankanum til RÚV í aðdraganda húsleitarinnar til lögreglu, þar sem lekinn kann að fela í sér refsivert brot. Málið er nú á borði lögreglustjórans á Vestfjörðum.