Blaðamenn gera 50 milljóna króna kröfu á hendur Torgi

Starfsmenn Fréttablaðsins undirbúa nú kröfu á hendur Torgi, útgefanda blaðsins, sem nemur í kringum 50 milljónum króna. Þetta er með vísan til höfundarréttarákvæða Blaðamannafélagsins og greiðslu sem Sýn innir af hendi vegna frétta sem Vísir hefur birt og unnar eru í Fréttablaðið. Mannlíf fjallaði um málið í morgun.

Helgi Magnússon er einn eigenda Torgs og situr í stjórn ásamt Ingibjörgu Pálmadóttur. Hann sagði í stuttu samtali við Vísi að honum hafi verið alls ókunnugt um að slík krafa gæti legið í loftinu þegar hann samdi um kaup á Fréttablaðinu og kom svo inn sem helmings eigandi 1. júlí á þessu ári. Helgi sagðist spurður að þetta hafi aldrei verið rætt í stjórn, hann þekkti málið því ekki og vísaði á formann Torgs sem er Ingibjörg Pálmadóttir; formaður talaði fyrir hönd félagsins.

Samkvæmt heimildum Mannlífs nemur heildarupphæð samkomulagsins milli Sýnar og Torgs um 100 milljónum króna sem er þá greiðsla fyrir afnot efnisins. Sá samningur rennur út 1. desember næstkomandi.

Vilja helming greiðslu

„Gengið var frá kaupunum í mars 2017 en samkvæmt samrunaskrá nam kaupverðið 7,8 milljörðum króna. Greint var frá því að Torg og Sýn hefðu gert með sér samstarfssamning um nýtingu efnis úr Fréttablaðinu á vísi.is til skamms tíma en við umfjöllun Samkeppniseftirlitsins var samkomulagið lagt fram sem fylgiskjal við kaupsamninginn og merkt trúnaðarmál,“ segir í Mannlífi.

Blaðamenn Fréttablaðsins telja sig hlunnfarna en samkvæmt aðalkjarasamningi Blaðamannafélags Íslands og Samtaka atvinnulífsins kveður á um að „við sölu á höfundaréttarvörðu efni til þriðja aðila, s.s. annarra fjölmiðla, einstaklinga eða samtaka, skal gera samkomulag um slíka sölu við einstaka vinnuhópa, s.s. ljósmyndara eða heildarsamtök rétthafa á hverjum vinnustað.

Tryggt skal í slíkum samningi að gætt sé í hvívetna sæmdarréttar rétthafa við frekari nýtingu á efninu og söluverð skal taka mið af því hvort efnið er notað til eigin nota eða annarrar útgáfu. Innkomu fyrir sölu á höfundarréttarvörðu efni skal að jafnaði skipt til helminga milli samningsaðila að frádregnum kostnaði sem haldið skal í lágmarki.“

Í kringum 30 stöðugildi sem um ræðir

Blaðamennirnir telja sig, með vísan til þessa, eiga rétt á helmingi greiðslunnar sem er þá um 50 milljónir króna. Ekki liggur fyrir hversu stór hópur það er sem stendur að þeirri kröfu. Mikil starfsmannavelta hefur verið á Fréttablaðinu á þessu tímabili sem þýðir að nokkur fjöldi blaðamanna gæti komið að kröfugerðinni en á að giska gæti verið um að ræða í kringum 30 stöðugildi blaðmanna og ljósmyndara.

Trúnaðarmaður blaðamanna Fréttablaðsins er Aðalheiður Ámundadóttir en Mannlíf hefur eftir henni að lögmaður hafi verið fenginn í málið og að Blaðamannafélagið fylgdist með. Aðalheiður telur líkur á að málið fari fyrir dómsstóla.