Vilja að Íslendingar ættleiði filippseyska eiturlyfjafíkla

„Við, undirritaðir íbúar Filippseyja, kunnum að meta áhyggjur ykkar af mannréttindum eiturlyfjafíkla, eiturlyfjasala og eiturlyfjagengja á Filippseyjum. Samúð ykkar með þeim er lofsverð,“ svona hefst áskorun á hendur Íslendinga og íslenskra stjórnvalda frá íbúum Filippseyja á undirskriftalistasíðunni change.org.

Áskorunin, sem Eiturlyfjagengi yfirgefið Filippseyjar tafarlaust, (e. Drug Cartels Leave Philippines Now!) stendur fyrir felst í því að Íslendingar eru beðnir um að ættleiða metamfetamínfíkla og dópsala Filippseyja. Rúmlega 16.500 hafa lagt nafn sitt við áskorunina þegar þetta er skrifað.

Ósætti með aðgerðir Íslands í Mannréttindaráði SÞ

Undanfari áskorunarinnar er ályktun til Mannréttindaráðs Sameinuðu þjóðanna sem Ísland var í forsvari fyrir fyrr í mánuðinum. Með samþykkt ályktunarinnar lýsir mannréttindaráðið formlega yfir áhyggjum af ástandinu á Filippseyjum, hvetur stjórnvöld í landinu til að stöðva aftökur á fólki án dóms og laga og draga þá til ábyrgðar sem staðið hafa fyrir slíku. 

Viðbrögð stjórnvalda á Filippseyjum voru þó nokkur og hafa Íslendingar verið sakaðir um hræsni og sagðir handbendi eiturlyfjabaróna. Forseti Filippseyja, hinn umdeildi Rodrigo Duterte, hefur sagst íhuga alvarlega að slíta stjórnmálasambandi við Ísland. Hann sagði þá einnig að Íslendingar skildu einfaldlega ekki þau félagslegu, efnahagslegu og pólitísku vandamál sem Filippseyjar glímdu við.

„Hvert er vandamál Íslands? Ekkert nema Ís. Það er vandamálið. Svo þið skiljið hvers vegna þar eru engir glæpir, engir lögreglumenn heldur, og þau borða bara ís,“ sagði forsetinn Duterte um Ísland.

Stuðningsmenn forsetans hér á landi hafa einnig látið óánægju sína í ljós, en hópur Filippseyinga hélt í síðustu viku á fund Birgis Þórarinssonar, þingmanns Miðflokksins. Þá sagði í Reykjavíkurbréfi Morgunblaðsins að utanríkisráðherra, Guðlaugur Þór Þórðarson, hafi með framgöngu sinni „slegið skjaldborg um vopnaða dópsala og grúppur af svipuðu tagi.“

Sjá einnig: Davíð segir Guðlaug Þór slá skjaldborg um filippseyska fíkniefnasala

Mikið pláss á Íslandi til að taka við fólki

Samþykkt ályktunarinnar hefur því vakið upp talsverð viðbrögð Filippseyinga eins og fjallað hefur verið um á undanförnum hálfum mánuði. Stuðningsmenn Duterte, sem tók við embætti árið 2016 hafa því efnt til áðurnefndrar undirskriftasöfnunar með það að markmiði að fá Ísland til að leysa vandamál landsins og taka við þeim aðilum sem tengjast eiturlyfjavandanum.

Í undirskriftasöfnuninni segir:

„Þar sem okkur líkar ekki við þau slæmu áhrif sem fíklarnir hafa á líf okkar, fjölskyldur, samfélag og landið okkar, styðjum við aðgerðir ríkisstjórnarinnar til þess að halda landsmönnum öruggum.

Við höfum tekið eftir því að á Íslandi búa einungis um 300.000 manns. Það þýðir að þar er mikið pláss til að taka við fleira fólki.

Til að koma í veg fyrir frekari blóðsúthellingar á Filippseyjum (af völdum metamfetamínfíkla, eiturlyfjasala og lögreglu sem hefur uppi í hárinu á þeim), getum við beðið ykkur um að standa við stóru orðin? Vinsamlegast ættleiðið og takið við eiturlyfjafíklunum okkar, dópsölunum og eiturlyfjagengjum.

Vinsamlegast veitið þeim hæli í landinu ykkar. Það yrði okkur sönn ánægja að afla fjár til þess að standa að ferðakostnaði til þess að þeir komi til landsins ykkar, þar sem mannréttindi þeirra yrðu að fullu virt.

Takk!“

„Ísland, látið okkur í friði - Ríkisstjórn Íslands er heimsk“

Undirskriftasöfnunin hófst fyrir viku síðan og á fimm dögum söfnuðust 15.000 undirskriftir. Fjöldi Filippseyinga hafa gert grein fyrir undirskrift sinni í ummælakerfi söfnunarinnar.

Imamura Elizabeth skrifar: „Milljónir Filippseyinga styðja Duterte forseta. Ísland látið okkur í friði, ekki skipta ykkur af óviðkomandi málum.“

Marco Teofilo skrifar: „ Ég skrifa undir af því að ég trúi því að Írland[sic] sé betur sett til þess að takast á við vanda þessa fólks.“

Tommy Jordan segir: „Ég skrifa undir af því að ég tel Ríkisstjórn Íslands vera heimska,“

Eins og áður segir hafa tæplega 17.000 Filippseyingar skrifað undir áskorunina, íbúar landsins eru þó um 100 milljónir og því eingöngu um að ræða lítinn hluta landsmanna.