Valsbanarnir unnu Kolbein og félaga

Kolbeinn Sigþórsson var í byrjunarliði Svíþjóðarmeistara AIK sem lutu í lægra haldi fyrir Slóveníumeisturum Maribor, 2-1, í fyrri leik liðanna í 2. umferð forkeppni Meistaradeildar Evrópu í kvöld.

Maribor sló Íslandsmeistara Vals úr leik í 1. umferð forkeppninnar, 5-0 samanlagt. AIK vann Ararat frá Armeníu, 4-3 samanlagt.

Rok Kronavater, sem skoraði í báðum leikjunum gegn Val, kom Maribor yfir strax á 6. mínútu.

Henok Goitom jafnaði fyrir AIK á 28. mínútu en tíu mínútum síðar kom Sasa Ivkovic Maribor í 2-1 sem urðu lokatölur leiksins.

Kolbeinn var tekinn af velli á 62. mínútu. Hann hefur komið við sögu í öllum leikjum AIK upp á síðkastið.

Seinni leikurinn fer fram á Vinavelli þeirra AIK-manna eftir viku.