Stelpurnar með endurkomusigur á Lúxemborg

Íslenska kvennalandsliðið í blaki vann endurkomusigur á Lúxemborg, 3-2, í þriðja leik sínum á Smáþjóðaleikunum í Svartfjallalandi.

Íslensku stelpurnar byrjuðu leikinn illa og töpuðu fyrstu tveimur hrinunum, 25-12 og 25-22.

Íslendingar vöknuðu til lífsins í 3. hrinunni sem þeir unnu, 25-17. Þrátt fyrir slæma byrjun í 4. hrinunni vannst hún líka, 25-21.

Ísland byrjaði oddahrinuna betur og komst í 4-1. Lúxemborg jafnaði í 8-8 en Ísland kláraði hrinuna, 15-11, eftir spennandi lokamínútur.

Fyrirliðinn Jóna Guðlaug Vigfúsdóttir var stigahæst í leiknum með 26 stig.

Ísland hefur unnið tvo leiki á Smáþjóðaleikunum og tapað einum. Næsti leikur íslenska liðsins er gegn Liechtenstein á morgun.