Drake reif kjaft við Draymond Green

Drake, rappari og stuðningsmaður Toronto Raptors, og Draymond Green, leikmaður Golden State Warriors, áttu í orðaskiptum eftir fyrsta leik úrslita NBA-deildarinnar í Toronto í nótt. Toronto vann leikinn, 118-109.

Drake hefur látið mikið fyrir sér fara í úrslitakeppninni í vor. Í fjórða leik Toronto og Milwaukee Bucks í úrslitum Austurdeildarinnar greip hann m.a. um axlirnar á Nick Nurse, þjálfara Toronto.

Rapparinn fékk skammir frá NBA-deildinni og var vinsamlegast beðinn um að reyna að hemja sig á hliðarlínunni.

Drake gat hins vegar ekki staðist freistinguna að núa Green tapinu um nasir eftir leikinn. Green hafði lítinn húmor fyrir stælunum í Drake og þeir skiptust á nokkrum vel völdum orðum.

Á blaðamannafundi eftir leik vildi Green ekki gera of mikið úr atvikinu og sagði að þeir Drake hefðu einfaldlega átt í orðaskiptum.

Drake mætti á leikinn í Toronto-treyju með nafni Dells Curry og númerinu 30 á bakinu. Sonur Currys, Steph, leikur með Golden State og er númer 30 eins og pabbinn sem lék með Toronto á árunum 1999-2002. Curry skoraði 34 stig í leiknum í nótt og var stigahæstur á vellinum.