Westbrook og George fóru báðir í aðgerð

Báðar ofurstjörnur Oklahoma City Thunder, Russell Westbrook og Paul George, lögðust undir hnífinn eftir að Thunder féll úr leik í NBA-deildinni.

Westbrook þurfti að láta laga vinstri hendina og annað hnéð. Hann á að verða tilbúinn er undirbúningstímabilið hefst.

Aðgerð George var aðeins stærri og er fastlega búist við því að hann missi af upphafi undirbúningstímabilsins. Hann verður þó klár í bátana er deildin rúllar af stað á nýjan leik.

Axlarmeiðsli George voru mikið að plaga hann síðustu tvo mánuði tímabilsins en hann ætti að mæta eins og nýsleginn túskildingur í næsta leik.

George var með 28,7 stig að meðaltali í leik í vetur en Westbrook var með 22,8 stig, 10,6 stoðsendingar og 9 fráköst að meðaltali í leik þennan veturinn.