Körfubolti

Gobert setti troðslumet í sigri á Phoenix

Ástrós Ýr Eggertsdóttir skrifar
Gobert kann að troða boltanum
Gobert kann að troða boltanum vísir/getty
Rudy Gobert setti troðslumet í bandarísku NBA deildinni í körfubolta í nótt.

Utah Jazz vann þægilegan 125-92 sigur á Phoenix Suns í nótt. Utah leiddi leikinn nær allan tímann og var tuttugu stigum yfir í hálfleik.

Gobert tróð sendingu frá Donovan Mitchell ofan í körfuna í öðrum leikhluta og það var troðsla númer 270 hjá honum á tímabilinu.

Síðan NBA deildin fór að taka saman tölfræði um troðslur árið 1997 hefur enginn náð fleiri troðslum á einu tímabili, Dwight Howard náði best 269 tímabilið 2007-08.

Gobert kláraði leikinn með 275 troðslur.

Devin Booker fór á kostum fyrir lið Phoenix í leiknum og setti 59 stig. Booker er aðeins 22 ára og er aðeins fjórði leikmaðurinn í sögunni til þess að fara yfir 50 stig í NBA deildinni áður en hann verður 23 ára gamall. Hinir þrír eru Le­Bron James, Rick Barry og Kyrie Irv­ing. Stórleikur Booker skilaði þó engu fyrir Phoenix. 





Portland Trail Blazers hafði betur gegn Brooklyn Nets í tvíframlengdum leik en sigurinn reyndist þeim dýr, þeir misstu einn af byrjunarliðsmönnum sínum í alvarleg meiðsli.

Það var mikil spenna í Portland og allt í járnum. Jusuf Nurkic var nýbúinn að koma Portland tveimur stigum yfir þegar liðið var á seinni framlenginguna þegar fóturinn á honum beygðist illa og það þurfti að bera hann út af á sjúkrabörum.

Portland endaði á því að vinna leikinn 148-144 og tryggja sér sæti í úrslitakeppninni, en það gæti reynst þeim mjög erfitt að missa Nurkic, sem er búinn að eiga eitt sitt besta tímabil á ferlinum.

Nurkic var stigahæstur leikmanna Portland í leiknum með 32 stig og 16 fráköst.





Í Memphis hafa heimamenn í Grizzlies gert heimavöll sinn að algjöru vígi síðustu vikur og unnið fimm heimaleiki í marsmánuði, alla þeirra á móti liðum sem eru í úrslitakeppnissætum.

Síðasti heimasigurinn kom í nótt gegn sterku liði Oklahoma City Thunder, 115-103.

„Þeir áttu þetta skilið. Frammistaða þeirra var betri, þeir yfirspiluðu okkur, settu leikinn betur upp, gerðu allt betur heldur en við,“ sagði Billy Donovan, þjálfari Thunder eftir leikinn.

Bruno Caboclo átti sinn besta leik á tímabilinu til þessa með 24 stig og Tyler Dorsey bætti 21 stigi við fyrir heimamenn.





Úrslit næturinnar:

Orlando Magic - Philadelphia 76ers 119-98

Memphis Grizzlies - Oklahoma City Thunder 115-103

Utah Jazz - Phoenix Suns 125-98

Portland Trail Blazers - Brooklyn Nets 148-144

NBA

Mest lesið


Fleiri fréttir

Sjá meira


×

Mest lesið