Umsóknarferli lána sjálfvirkt í Íslandsbanka

Íslandsbanki mun um helgina hleypa af stokkunum nýrri lausn á netinu sem heitir „Velkomin í hópinn“. Viðskiptavinir munu geta skráð sig í viðskipti hjá bankanum í appi eða á vefnum og stofnað bankareikninga og sótt um kreditkort á örfáum mínútum.

„Það sem er nýtt í þessu er að umsóknarferli lána og kreditkorta er með öllu orðið sjálfvirkt,“ segir Birna Einarsdóttir, bankastjóri Íslandsbanka, í samtali við Fréttablaðið. Skapað hafi verið ferli sem auki skilvirkni og hagkvæmni í rekstri. Í lok mánaðarins verði boðið upp á hefðbundin útlán í appinu eða á vefnum sem séu undir tveimur milljónum króna.

Á allra næstu vikum verði lausnin jafnframt á ensku og jafnvel fleiri tungumálum. Hún segir að það sé nýmæli að nú geti útlendingar með íslenska kennitölu stofnað rafrænt launareikning og fleira. Birna vekur athygli á að færri heimsæki útibúin en áður en fólk vilji áfram ráðgjöf og bendir á að 95 prósent greiðslumata bankans vegna húsnæðislána fari fram á netinu. – hvj