Komu Justin Shouse algjörlega að óvörum í gær

Justin Shouse var heiðraður sérstaklega fyrir leik Stjörnunnar og Keflavíkur í Domino´s deild karla í körfubolta í gær.

Stjörnumenn hengdu þá upp treyju Justin Shouse og hér eftir getur enginn leikmaður Garðabæjarliðsins spilað í treyju númer tólf.

Justin Shouse skrifar um þessa merkilegu stund á fésbókinni og þar kemur í ljós að hann vissi ekkert af þessu fyrir fram, hélt aðeins að hann væri að fara á leik með Stjörnuliðinu.

Justin metur þetta mikils og er mjög þakklátur fyrir þann heiður sem honum var þarna sýndur en hann er sá fyrsti í sögu körfuboltans í Stjörnunni sem fær treyju sína upp á vegg.

Í pistli Justins á fésbókinni kemur meðal annars fram að dóttir hans fæddist 12.12 og það er vel við hæfi fyrir mann sem spilaði alltaf númer tólf hér á landi.

Justin Shouse spilaði með Stjörnunni frá 2008 til 2017 og var lykilmaður í öllum þremur bikarmeistaratitlum félagsins (2009, 2013 og 2015) sem og þegar liðið fór tvisvar sinnum í úrslitin um Íslandsmeistaratitilinn (2011 og 2013).

Justin Shouse lék alls 186 deildarleiki og 58 leiki í úrslitakeppninni með Stjörnunni. Í þessum 244 leikjum á Íslandsmótinu var hann með 4835 stig og 1610 stoðsendingar eða 19,8 stig og 6,6 stoðsendingar að meðaltali í leik.

Í sigurleikjunum þremur í bikarúrslitunum í Laugardalshöllinni var hann með samtals 55 stig og 28 stoðsendingar eða 18,3 stig og 9,3 stoðsendingar að meðaltali í leik.

Hér fyrir neðan má sjá þakkarorð Justins í tilefni af gærkvöldinu.