Körfubolti

Flugeldasýning hjá Golden State Warriors og toppsætið er loksins aftur þeirra

Óskar Ófeigur Jónsson skrifar
Stephen Curry skoraði 31 stig á 30 mínútum og hvatti síðan liðsfélagana áfram á bekknum.
Stephen Curry skoraði 31 stig á 30 mínútum og hvatti síðan liðsfélagana áfram á bekknum. Getty/Matthew Stockman
Allt er að færast í eðlilegra horf í Vesturdeild NBA-deildarinnar í körfubolta eftir að ríkjandi NBA-meistarar Golden State Warriors komust aftur í efsta sætið í vestrinu eftir sigur í toppslag í nótt.

Philadelphia 76ers burstaði Timberwolves, Giannis Antetokounmpo var með þrennu á 24 mínútum og Los Angeles Lakers vann nauðsynlegan sigur þegar Bulls komu í heimsókn.





Skvettubræðurnir Stephen Curry og Klay Thompson skoruðu báðir 31 stig þegar Golden State Warriors vann 142-111 sigur á Denver Nuggets í leik á milli tveggja efstu liðanna í Vesturdeildinni. Denver Nuggets var á toppnum fyrir leikinn en Warriors menn tóku af þeim efsta sætið með þessum stórsigri.

Golden State Warriors liðið setti líka NBA-met í fyrsta leikhlutanum þegar liðið skoraði 51 stig og setti niður tíu þriggja stiga körfur. Gamla metið var 50 stig og áttu það mörg lið en það hafði engu að síðustu ekki gerst síðan í nóvember 1990. Nú á bara hinsvegar eitt lið þetta met.

„Fallegur, svo fallegur körfubolti. Ég man líka ekki eftir betri fyrsta leikhluta. Þetta var flugeldasýning,“ sagði Steve Kerr, þjálfari Golden State Warriors eftir leikinn. Golden State Warriors vann þarna sinn fimmta leik í röð og sjöunda sigurinn í síðustu átta leikjum.

Stephen Curry, Klay Thompson og Kevin Durant hittu saman úr 18 af 28 þriggja stiga skotum sínum í leiknum en Durant átti fínan leik líka og var með 27 stig og 6 stoðsendingar á 30 mínútum. Curry var með 4 stoðsendingar og skoraði 31 stig á 30 mínútum en Klay var með 31 stig á 25 mínútum.

Það var fleira sem minnti aftur á meistaraliðið frá því í fyrra því Warriors liðið vann mínúturnar sem Draymond Green spilaði með 41 stigi. Hann var bara með 4 stig en gaf 13 stoðsendingar og tók 6 fráköst.

Malik Beasley var atkvæðamestur hjá Denver með 22 stig en besti maður liðsins í vetur, Nikola Jokic, var í villuvandræðum og spilaði aðeins í 23 mínútur. Hann endaði leikinn engu að síður með 17 stig og 8 stoðsendingar.









Joel Embiid var með 31 stig og 13 fráköst þegar Philadelphia 76ers vann öruggan 149-107 sigur á Minnesota Timberwolves í fyrsta leik Jimmy Butler á móti sínum gömlu liðsfélögum í Minnesota.

Philadelphia 76ers gaf tóninn strax í byrjun og skoraði á endnaum 83 stig í fyrri hálfleiknum. Jimmy Butler skoraði 19 stig í leiknum og hitti úr 8 af 10 skotum utan af velli. Ben Simmons vantaði líka bara eina stoðsendingu í þrennuna (20 sitg, 11 fráköst, 9 stoðsendingar.





Giannis Antetokounmpo var með þrennu á aðeins 24 mínútum þegar Milwaukee Bucks fór létt með Miami Heat 124-86. Grikkinn öflugi var með 12 stig, 10 fráköst og 10 stoðsendingar.





Lonzo Ball skoraði 19 stig, tók 8 fráköst og gaf 6 stoðsendingar þegar Los Angeles Lakers vann 107-100 heimasigur á Chicago Bulls. Kentavious Caldwell-Pope bætti við 17 stigum og þeir Brandon Ingram og Kyle Kuzma voru báðir með sextán stig.

Lakers var búið að tapað tveimur leikjum í röð þar af leiknum á undan á móti Cleveland Cavaliers. Þetta var líka aðeins fjórði sigur Lakers í ellefu leikjum síðan að LeBron James meiddist.

Luke Walton, þjálfari Lakers, gerði tvær breytingar á byrjunarliði sínu fyrir þennan leik því miðherjinn Tyson Chandler kom inn fyrir JaVale McGee og Josh Hart fór á bekkinn fyrir Kentavious Caldwell-Pope.

Jabari Parker skoraði mest fyrir Chicago Bulls eða 18 stig á aðeins 17 mínútum af bekknum en Finninn Lauri Markkanen bætti við 17 stigum.





Nýliðinn Trae Young skoraði 24 stig og gaf 11 stoðsendingar þegar lið hans Atlanta Hawks rúllaði yfir Oklahoma City Thunder 142-126 en John Collins var stigahæstur í Atlanta liðinu með 26 stig. Russell Westbrook var með 31 stig og 11 stoðsendingar í liði Thunder og Paul George skoraði 24 stig.

Úrslitin í NBA-deildinni í nótt:

Los Angeles Lakers - Chicago Bulls 107-100

Denver Nuggets - Golden State Warriors    111-142    

Milwaukee Bucks - Miami Heat    124-86    

Atlanta Hawks - Oklahoma City Thunder    142-126    

Indiana Pacers - Phoenix Suns    131-97    

Philadelphia 76ers - Minnesota Timberwolves    149-107  



NBA

Mest lesið


Fleiri fréttir

Sjá meira


×

Mest lesið